Аргентина президенти ўз партияси учун омадсиз кечган сайловлардан сўнг, мухолифатни диалогга чақирди

Аргентина президенти Альберто Фернандес 14 ноябрь куни мухолифатни диалогга чақириб, «Умумий фронт» ҳукуматга ёрдамлашувчи альянси парламент сайловларида 23 та вилоятнинг саккизтасидагина етакчилик қила олгани учун ўз ҳукуматининг хатосини тан олди, деб хабар беради «ТАСС».

«Энг қисқа вақтлар ичида иложи борича ҳамкорликка асосланган кун тартибини келишиб олиш мақсадида халқ хоҳишини ифода этаётган арбобларга ва сиёсий партияларга мурожаат қиламан. Ватанпарварлик мухолифати — бу диалогга очиқ бўлган масъул мухолифат. Мамлакатимиз ҳозирда ушбу ватанпарварликка муҳтож», — дейди у ўз видеомурожаатида.

«Биз хатоликларга йўл қўйдик. Мен хато қилдим. Мен ундан хулоса чиқаришим керак», — дея таъкидлаган Фернандес.

14 ноябрь куни Аргентинада парламент сайловлари бўлиб ўтди. Унинг натижасига кўра, Депутатлар палатасидаги 257 та жойдан 127 таси, Сенатдаги 72 тадан эса 24 таси янгиланади. 90 фоиздан ортиқ овозларнинг ҳисоб-китобига кўра, «Ўзгаришлар учун бирга» ўнг марказий мухолифат альянси ҳамда унинг тарафдорлари 12 та вилоятда, жумладан, мамлакат пойтахтида етакчилик қилмоқда.

Айни вақтда «Умумий фронт»нинг юқори палатада 41 та, қуйида эса 120 та ўрни мавжуд. Ҳозирга қадар саналган овозларнинг прогнозига кўра, «Умумий фронт» Сенатда янгиланаётган ўринларнинг тўққизтасини олади ва парламент юқори палатасидаги мутлақ кўпчиликни йўқотади. Депутатлар палатасида эса 46 та ўринга эга бўлиши мумкин.

Аввалроқ Никарагуада президент ва парламент депутатлари учун умумий сайловлар бўлиб ўтгани, Шимолий Македония бош вазири Зайев иккинчи бор истеъфо бергани тўғрисида хабар берилганди.