Хакерлар АҚШ Федерал қидирув бюросининг (ФҚБ) ташқи электрон почта тизимини бузиб кириб, камида 100 минг кишига электрон хат жўнатгани хабар қилинганди. ФҚБнинг маълум қилишича, ҳужумчилар чиндан ҳам ФҚБ манзилларидан сохта электрон почта хабарларини юборган, бироқ улар бюро маълумотларига киришга ёки уларни бузишга муваффақ бўлмаган.
ФҚБ маълумотларига кўра, номаълум шахслар дастурий таъминот созламаларидаги хатоликлардан фойдаланган, бу эса уларга LEEP ҳуқуқ-тартибот порталидан сохта электрон почта хабарларини юбориш имконини берган. LEEP — ФҚБнинг IТ-инфратузилмаси бўлиб, бюро ундан штатлар ва шаҳарлардаги ҳамкасблари билан мулоқот қилиш учун фойдаланади. Бу сервис ФҚБнинг ички почтаси билан боғлиқ эмас, дейилади бюро хабарида.
«Ҳеч ким ФҚБ тармоқларидаги бирор бир маълумот ёки шахсий маълумотларга кира олмаган ёки уларни буза олмаган», — дея ишонтирилади бюро хабарида. Шунингдек, улар камчиликлар аллақачон бартараф этилганини маълум қилди.
Аввалроқ Bloomberg агентлиги спам-хабарлар тарқалишини кузатувчи Британиянинг Spamhaus ташкилотига таяниб, ФҚБнинг ташқи электрон почта тизими бузилгани ҳақида хабар берган эди. Ташкилот маълумотларига кўра, бузғунчиликдан сўнг хакерлар «киберҳужум эҳтимоли ҳақида огоҳлантирувчи» камида 100 000 та электрон хат жўнатган.
Spamhaus маълумотларига кўра, сарлавҳасида «Тезкор: тизимда босқинчи» деб ёзилган хатларнинг юборилиши ярим тунда бошланган. Электрон хатлар АҚШ Ички хавфсизлик вазирлиги номидан юборилган, уларда қабул қилувчилар киберхавфсизлик бўйича мутахассис Винни Троя босқинчи экани ҳақида огоҳлантирилган. 2020 йилда Троя The Dark Overlord хакерлар гуруҳи устидан текширув ўтказиб, гуруҳдаги хакерларнинг шахсини ошкор қилган эди.
Spamhaus’нинг таъкидлашича, электрон почта хабарларига ҳеч қандай зарарли дастур бириктирилмаган бўлса-да, жўнатувчилар қабул қилувчиларга барча ички тизимларни текширишни қатъий тавсия қилган. Spamhaus’нинг фикрича, ҳужумчилар Троянинг номига туҳмат қилишга ёки ФҚБ телефон линияларини безовта одамларнинг қўнғироқлари билан тўлдириб ташлашга уринган бўлиши мумкин.
Мавзуга доир:
Изоҳ (0)