Туркманистон президенти Гурбангули Бердимуҳамедов Истанбулда бўлиб ўтган Туркий кенгашдаги иштирокидан сўнг Туркманбоши шаҳрига келди, деб ёзади «Хроника Туркменистана».
Нашрнинг Туркманистон давлат ахборот агентлигига таяниб, хабар беришича, 13 ноябрь куни Бердимуҳамедов Каспий денгизи соҳилида жойлашган спорт мажмуасида бош вазир ўринбосарлари билан бирга мини-футбол ўйнаган.
Сўнг Туркманистон президенти шаҳарда барпо этилаётган 400 ўринли шифохона қурилишини кўздан кечирган. Етти қаватли тиббиёт мажмуасининг тузилиши давлат раҳбарига «планшет ва моделлар орқали» кўрсатилди, дейилади хабарда.
Шундан сўнг Бердимуҳамедов айрим бош вазир ўринбосарлари, Транспорт ва коммуникациялар агентлиги раҳбари, соғлиқни сақлаш вазири билан амалий йиғилиш ўтказган.
Туркманбоши шаридаги «Аваза» Миллий туристик зонасида йирик халқаро тадбирлар ўтказилаётгани боис, давлат раҳбари бу ерда турли мақсадлардаги объектлар қуришни давом эттириш бўйича кўрсатмалар берган. Гурбангули Бердимуҳамедов қурилаётган шифохона соғлиқни сақлаш соҳасида халқаро аҳамиятга молик тадбирларни ўтказувчи марказга айланиши кераклигини таъкидлаган.
Учрашувдан сўнг президент Туркманистон пойтахтига учиб кетган.
7 август куни Бердимуҳамедов «Аваза»да жойлашган «Аваза» спорт мажмуасига ўғли Сердар Бердимуҳамедов билан бирга борганди. У ерда давлат раҳбари тренажёрларда бир нечта машқларни бажарган.
Аввалроқ Гурбангули Бердимуҳамедов Ашхобод яқинидаги туманлардан бирига сафари чоғида ўзининг тўппончадан ўқ узиш маҳоратини намойиш этганди. «Ўқ отиш майдонида давлат раҳбари нишонга бир неча бор ўқ узди ва барча ўқлар нишон марказига тегди, бу миллат етакчисининг юксак маҳоратидан далолатдир», — дейилади хабарда.
Анъанага кўра, Бердимуҳамедов нишонга дастхат қолдирган.
Изоҳ (0)