Шавкат Мирзиёев раислигидаги видеоселектор йиғилиши бўлиб ўтди. Бу ҳақда давлат раҳбари матбуот котиби Шерзод Асадов маълум қилди.
«Ҳар бир ҳудудда сайловолди учрашувларда халқимиз билан бирга катта-катта марраларни белгилаб олдик. Олдимизда турган энг муҳим вазифа — ушбу дастурларни маҳаллагача тушириб, ижросини таъминлаш ҳисобланади.
Бугунги кунга қадар шаклланган дастур лойиҳалари эскича қолипда тайёрланган ва бирортасида ‘эга-кесим’ йўқ, бирорта вилоят ҳокими буни ўзидан ўтказмаган.
Шу боис 2022 йилдан берилаётган маблағлар ва яратилаётган имкониятлар маҳалланинг эҳтиёжидан келиб чиқиб белгиланади. Бунда маҳаллада иш ўринлари яратиш ва камбағалликни қисқартириш асосий мезон бўлади.
Бу ишларни амалга оширишга ҳоким ёрдамчилари масъул бўлади», — деди давлат раҳбари йиғилиш аввалида.
Бундан аввал Наманганда 65 гектарлик «Янги Ўзбекистон» боғи барпо этилиши, Ўзбекистонда 2022 йил 1 январдан 10 мингга яқин маҳаллада ҳоким ёрдамчилари иш бошлаши ҳамда Ўзбекистон бўйлаб молия-иқтисодиёт сектори ходимлари мажбуран маҳаллада ҳоким ёрдамчиси лавозимига ўтказилаётгани ҳақида хабар берилганди.
Изоҳ (0)