Наманган вилояти ИИБ ижтимоий тармоқларда тарқалган онаси йўқолиб қолгани сабаб Президент Шавкат Мирзиёевга видеомурожаат йўллаган фуқаро билан боғлиқ ҳолат юзасидан маълумот берди.
Видеомурожаатдаги аёлнинг сўзларига кўра, унинг онаси йўқолганига 4 ой бўлган. Аёлнинг Қирғизистонга ўтиб кетган бўлиши мумкинлиги ҳам айтилган. Шунингдек, у онасини топиш мақсадида хорижга чиқиш паспортини ололмаётганини таъкидлаб, ИИБ ходимларига чора кўришни сўраган.
Идора матбуот хизматининг маълум қилишича, Уйчи туманида яшовчи фуқаро К.Р. 12 июль куни туман прокурори номига ариза билан мурожаат қилиб, унда онаси С.Р. қарздор бўлиб қолганидан сиқилиб, 4 июль куни яшаш хонадонидан чиқиб кетгани ва бедарак йўқолганини маълум қилиб, онасини қидириб топишда амалий ёрдам беришликни сўраган.
Олиб борилган суриштирув ишлари натижасида бедарак йўқолган С.Р.нинг яшаш шароити ва оиладаги муҳит ўрганилган. Аниқланишича, оила С.Р.нинг турмуш ўртоғи Н.Р. ва ўғли К.Р.нинг кунлик ишлаб топган маошидан ҳамда ўзи томонидан кийим-кечак савдосидан тушган даромадлар орқали кун кечиради. Бедарак йўқолган С.Р. ўзининг номига 2020 йил ноябрь ойида «Агробанк» Уйчи туман филиалидан қорамолчилик учун 29,7 миллион сўм кредит маблағлари расмийлаштириб, ушбу пулларни ўзининг эҳтиёжига ишлатиб юборган.
У кредит маблағларини тўлашга қийналгани, савдо-сотиқ ишлари ҳам юришмаганидан оила аъзолари орасида ноқулай ҳолатга тушиб қолгани, шунингдек, келини ва қизи ўртасидаги ўзаро оилавий келишмовчиликлардан безигани сабаб бироз муддат ўзи ёлғиз яшамоқчи бўлиб, номаълум томонга кетгани маълум бўлган.
Бедарак йўқолган С.Р.ни топиш мақсадида тезкор суриштирув ишларини олиб борилганида аёл яшаш хонадонидан 4 июль куни чиқиб кетган бўлса-да, 8 июль куни соат тахминан 14:30-15:00 лар чамасида муқаддам ўзи билан бирга Наманган шаҳар «Чорсу» бозорида кийим-кечак савдоси билан шуғулланиб келган фуқаро уни кўрганини маълум қилган. У оилавий келишмовчиликлар, банкдан олган кредит маблағларини тўлолмаётгани, савдо-сотиқ ишлари юришмаётганини билдирган, аммо ҳозир нима иш қилаётгани ва қайси манзилда яшаб юрганини айтмаган.
Таъкидланишича, бедарак йўқолган С.Р.ни қидириб топиш мақсадида Уйчи туман ИИБнинг барча шахсий таркиби ҳамда тунги хизматга жалб этилган барча ходимлар, вилоят ИИБ ЖҚБ ва ППХваЖЦБ ходимлари ҳолат бўйича хабардор қилиниб, қидириб топиш юзасидан тегишли топшириқлар берилган.
С.Р.нинг рангли фотосуратлари барча блок постлар, бозорлар, одамлар гавжум бўладиган ҳудудлар, автомобиль тўхташ жойлари, поезд вокзаллари, ижтимоий тармоқларга жойлаштирилиб, аҳолини хабардор этиб борилмоқда, истироҳат боғлари, гузар ва ошхоналарга фотосуратлари ёпиштириш чоралари кўрилмоқда.
«Шунингдек, С.Р.нинг оила-аъзолари, яқин қариндошлари, таниш дўстлари, иш жойларидан ва бошқа алоқалари билан муносабати қандай бўлганига ойдинлик киритиш мақсадида суриштирув ишлари олиб борилмоқда. Ҳозирда аёлнинг бедарак йўқолганлик ҳолати бўйича хабарномалари барча шаҳар, туман ИИБлари ҳамда Наманган вилояти телерадиокомпаниясига юбориш чоралари кўрилиб, қидириб топиш юзасидан қўшимча тезкор-қидирув суриштирув ишлари давом эттирилмоқда», — дейилади хабарда.
Аввалроқ Андижонда 18 ёшли йигит каналга оқизиб юборилгани айтилаётган хабар юзасидан жиноят иши қўзғатилгани, Қашқадарёда 9 йил аввал бедарак йўқолган фуқаро ўлдирилиб, далага кўмиб кетилгани аниқлангани тўғрисида хабар берилганди.
Изоҳ (0)