Namanganda 65 gektarlik “Yangi O‘zbekiston” bog‘i barpo etiladi

Namanganda “Yangi O‘zbekiston” bog‘i barpo etiladi, deya xabar bermoqda viloyat hokimligi matbuot xizmati.

Ma’lum qilinishicha, Namanganda “Dolzarb 40 kunlik” aksiyasi doirasida Davlatobod tumanida qurilishi boshlangan Yangi Namangan shaharchasi bo‘ylab daraxt o‘tqazildi.

Jarayonda Namangan viloyati hokimi Shavkatjon Abdurazzoqov, nuroniylar, mahalla faollari, korxona, tashkilot rahbarlari, yoshlar va keng jamoatchilik ishtirok etdi.

Ma’lumot o‘rnida, Davlatobod tumanining “Yuksalish” hamda To‘raqo‘rg‘on tumanining “Yettikon” mahallalari hududidan yashil makon uchun 1 ming 371 gektar yer ajratilgan. Bu hududda Yangi Namangan shaharchasini barpo etish uchun qurilish ishlari allaqachon boshlab yuborilgan.

“Maydon faqatgina binolardan iborat bo‘lgan joy emas, balki ekologik musaffolik mavjud bo‘lgan hududga aylanadi. Shu bois ham“Yashil hudud” 65 gektarlik “Yangi O‘zbekiston” bog‘i barpo etilmoqda.

Bugungi daraxt ekish aksiyasida yig‘ilganlar mazkur bog‘ loyihasi taqdimoti bilan ham tanishishdi va bog‘ga ilk daraxtlarni o‘tqazishdi”, – deyiladi hokimlik xabarida.

2026-yilga borib Yangi Namangan shaharchasi bir million aholi istiqomat qiladigan yirik va yashil shaharga aylanishi ko‘zda tutilgan.

Eslatib o‘tamiz, avvalroq Toshkentda ham “Yangi O‘zbekiston” bog‘i qurib bitkazilgan edi.