Ўзбекистонда ўзаро қариндошларнинг давлат корхонасида бири иккинчисига бўйсуниб ишлаши тақиқланиши мумкин

Ўзбекистонда ўзаро яқин қариндошларни ишга олганлик учун жарима кўзда тутилган қонун лойиҳаси жамоатчилик муҳокамаси учун эълон қилинди. Ҳужжат билан Меҳнат кодексига қариндошларни ишга олишни тақиқлаш, Маъмурий жавобгарлик тўғрисидаги кодексга эса буни бузганлик учун жарима белгилаш кўзда тутилган ўзгартириш ва қўшимчалик киритиш режалаштирилган.

Унга кўра, ўзаро яқин қариндош ёки қуда-анда бўлган шахсларнинг (катта бобо-бувилар, бобо-бувилар, ота-оналар, ўғил ва қизлар, невара ва эваралар, эр-хотинлар, шунингдек, эр-хотинларнинг ота-оналари, ака-укалари, опа-сингиллари ва болалари), башарти улардан бири иккинчисига бевосита бўйсуниб ёки унинг назорати остида хизмат қиладиган бўлса, бир давлат корхонаси ва унинг таркибидаги тузилмаларда бирга хизмат қилишлари тақиқланади.

Ўзаро қариндошларнинг (ака-ука, опа-сингил, уларнинг болалари, ота-онанинг ака-ука ва опа-сингиллари ҳамда уларнинг болалари, бобо ва бувиларнинг ака-ука ҳамда опа-сингиллари ва уларнинг болалари ҳамда шунга ўхшашлар), бир давлат ташкилоти ва унинг таркибидаги тузилмалар бири иккинчисига бевосита бўйсинувида ёки унинг назорати остида бўлганда хизмат қилишига йўл қўйилмайди.

Давлат хизматчиси ўзаро қариндошлик ришталарига эга бўлган шахс билан хизмат қилаётганлиги ўзига маълум бўлган вақтдан бошлаб 10 кун муддат ичида давлат ташкилоти раҳбарига бу ҳақида хабар бериши лозим.

Шунингдек, ушбу ҳолатлар ходим билан меҳнат шартномаси тузилгандан сўнг аниқланган тақдирда, иш берувчи ушбу ходимлардан бирини, бири иккинчисига бевосита ёки унинг назорати остида бўлмаган аввалгисига тенг бошқа иш (лавозим)га ўтказиш чораларини кўриши шарт.

Ўзаро яқин қариндош бўлган шахсларнинг бир давлат ташкилоти ва унинг таркибидаги тузилмаларда бири иккинчисига бевосита бўйсуниб ёки унинг назорати остида хизмат қилаётганлиги ҳақида иш берувчига маълум қилмаслик, БҲМнинг 15 бараваридан 20 бараваригача (4 миллион сўмдан 5,4 миллион сўмгача) миқдорда жарима солиш кўзда тутилмоқда

Бу ҳақда билган иш берувчи ушбу ходимлар ишлаб келган иш (лавозим)га тенг бошқа иш (лавозим)га ўтказиш чораларини кўрмаганлик учун эса БҲМнинг 25 бараваридан 30 бараваригача (6,7 миллион сўмдан 8,1 миллион сўмгача) миқдорда жарима солиш режалаштирилган.

Ушбу ҳужжат лойиҳаси муҳокамаси 30 ноябргача давом этади.