«Ҳоким ёрдамчилари томорқаси бўлган хонадонларда парранда, қуён, қўй ва эчки, камида 5–10 та курка, 5 та асалари уяси боқилишини ташкил этишга кўмаклашиши лозим» — Шавкат Мирзиёев

Бугун, 15- ноябрь куни, давлат раҳбари раислигида бўлиб ўтаётган видеоселектор йиғилишида 2022 йилда камбағаллик ва ишсизликни қисқартириш борасида кўриладиган қатор чора-тадбирлар тўғрисида маълум қилинди.

Унга кўра:

• оилавий тадбиркорлик дастурлари, ишсиз аҳоли ва ёшларни касб-ҳунар ва тадбиркорликка ўқитиш, хизмат кўрсатиш соҳаларидаги лойиҳаларни амалга ошириш учун 13 триллион сўм берилади;
• пахта ва ғалладан бўшайдиган 200 минг гектар майдоннинг 80 минг гектари аҳолига берилади;
• мева-сабзавот лойиҳаларига 100 миллион доллар ва мева-сабзавот кластерларига 2 триллион сўм ресурс йўналтирилади;
• аҳоли бандлигини таъминлашда 500 минг гектардан зиёд томорқалардан самарали фойдаланиш учун келгуси йилда 100 миллион доллар йўналтирилади;
• аҳоли томорқасида деҳқончиликни йўлга қўйиш учун банклар томонидан 7 фоиз ставкада имтиёзли кредитлар берилади.