Хакерлар АҚШ Федерал қидирув бюросининг (ФҚБ) ташқи электрон почта тизимини бузиб кирди. Бу ҳақда спам-хабарлар тарқалишини кузатувчи Британиянинг Спамҳаус ташкилотига таяниб, «РБК» хабар берди.
Ташкилот маълумотларига кўра, бузғунчиликдан сўнг хакерлар «киберҳужум эҳтимоли ҳақида огоҳлантирувчи» камида 100 000 та электрон хат жўнатган.
ФҚБнинг маълум қилишича, бюро ҳамда АҚШнинг Киберхавфсизлик ва инфратузилмани ҳимоя қилиш агентлиги (Ички хавфсизлик вазирлигига бўйсунади) ходимлари @ ic.fbi.gov билан тугайдиган аккаунт орқали сохта хатлар юборилиши воқеасидан хабардор.
«Айни пайтдаги вазият шундай ва биз ҳозирча қўшимча маълумот бера олмаймиз», — дейилган ФҚБ хабарида.
BlueВоянт киберхавфсизлик компанияси бўлимларидан бирининг раҳбари Остин Бергласнинг Bloomberg агентлигига айтишича, ФҚБда бир нечта электрон почта тизимлари мавжуд. Унинг сўзларига кўра, бузғунчиликка учраган ҳисобга ҳамма кира олади. Ундан агентлар ва ФҚБ ходимлари фуқаролар билан электрон ёзишмалар олиб боришда фойдаланади.
«Бу хакерлик ҳужумига учраган махфий тизим эмас. Бу махфий бўлмаган маълумотларни алмашиш ва узатиш учун ишлатиладиган ташқи аккаунтдир», — деди Берглас. Унинг ўзи илгари ФҚБнинг Нью-Йоркдаги бўлимига масъул махсус агент ёрдамчиси бўлган.
Спамҳаус маълумотларига кўра, сарлавҳасида «Тезкор: тизимда босқинчи» деб ёзилган хатларнинг юборилиши ярим тунда бошланган. Электрон хатлар АҚШ Ички хавфсизлик вазирлиги номидан юборилган, уларда қабул қилувчилар киберхавфсизлик бўйича мутахассис Винни Троя босқинчи экани ҳақида огоҳлантирилган. 2020 йилда Троя The Дарк Оверлорд хакерлар гуруҳи устидан текширув ўтказиб, гуруҳдаги хакерларнинг шахсини ошкор қилган эди.
Спамҳаусънинг таъкидлашича, электрон почта хабарларига ҳеч қандай зарарли дастур бириктирилмаган бўлса-да, жўнатувчилар қабул қилувчиларга барча ички тизимларни текширишни қатъий тавсия қилган. Спамҳаусънинг фикрича, ҳужумчилар Троянинг номига туҳмат қилишга ёки ФҚБ телефон линияларини безота одамларнинг қўнғироқлари билан тўлдириб ташлашга уринган бўлиши мумкин.
Мавзуга доир:
Изоҳ (0)