Бразилия Олий федерал суди (STF, Конституцион суд функцияларини бажаради) иш берувчиларга ўз ходимларидан коронавирус инфекциясининг янги турига қарши эмланганлик тўғрисида маълумотнома талаб қилишларига рухсат берди. Бу ҳақда мамлакат олий суд инстанциясига таяниб, «ТАСС» хабар берди.
«Судья Луис Роберту Баррозу Меҳнат ва пенсия таъминоти вазирлигининг компанияларга ишчиларни ёллаш ёки меҳнат шартномаларини узайтиришда ходимлардан вакцинациядан ўтганлик бўйича маълумотнома сўрашни тақиқлаган буйруғининг амалга оширилишини қисман тўхтатди. Шу орқали иш берувчиларга ўз ходимлардан бу борадаги тасдиқловчи ҳужжатни сўрашга рухсат берилади», — дейилади хабарда.
Судьянинг фикрича, эмланмаган ходимларнинг иш жойида бўлиши, «бошқа соғлом ходимларга хавф туғдириши мумкин». Унинг ҳисоблашича, бундай ҳолатни жинсий, ирқий ва бошқа сабабларга кўра камситишлар билан бир қаторга қўйиш тўғри эмас. Шу билан бирга, судьянинг таъкидлашича, вакцинациядан ўтмасликка фақат тиббий сабаблари бор фуқароларга истисно мавжуд, меҳнат шартномасини эса фақат энг охирги чора сифатида бузиш керак.
Баррозу бу каби қарорни Меҳнат партияси ва Бразилия социалистик партиялари бирлашган сўл марказчиларнинг «яшиллар» партияси даъвосига кўра қабул қилган. Аввалроқ STF пленуми ўз қарорларида мажбурий иммунизация ғоясига йўл қўймаган ҳолда мажбурий эмлаш талабларининг қонунийлигини кўрсатган эди.
Бразилия Соғлиқни сақлаш вазирлиги маълумотларига кўра, 213 миллион аҳоли истиқомат қиладиган мамлакатда 126 миллион ортиқ одам коронавирусга қарши эмланган. Республикада коронавирус пандемияси бошланганидан буён қарийб 22 миллион кишида COVID-19 тасдиқланган, 610 минг киши вафот этган.
Аввалроқ Бразилия сенаторлари коронавирус билан боғлиқ вазият сабаб президент Болсонаруга қарши айбловни маъқуллаганди. Болсонару ва ҳукуматнинг бошқа аъзолари коллектив иммунитетга эришиш умидида коронавируснинг аҳоли орасида тарқалишига йўл қўйганликда айбланган.
Изоҳ (0)