Британия ҳарбийлари Польша—Беларусь чегарасидаги тўсиқларни мустаҳкамлашга ёрдам беради. Бу ҳақда Польша мудофаа вазирлиги раҳбари Мариуш Блашчакга таяниб, «Известия» хабар берди.
«Британия муҳандислик кучларининг кўмагидан олдин разведка ишлари бошланди. Бизнинг аскарлар Польша—Беларусь чегарасидаги тўсиқни мустаҳкамлашда (улар билан) ҳамкорлик қилади» — деб ёзди у ўзининг Twitter саҳифасида.
12 ноябрь куни эрталаб Беларусдан «Брузги» назорат-ўтказиш пункти орқали бир нечта муҳожирлар Польшага ўтиб кетгани маълум бўлди. Қайд этилишича, қочқинлар Беларусь ҳудудини тарк этиб, Польша мудофаа девори бўйлаб ҳаракатлана бошлаган. Шунингдек, ҳозирги пайтга келиб қочқинларнинг ҳаммаси қўлга олингани хабар қилинди. Ўз навбатида, Беларусь Давлат чегара қўмитаси бир гуруҳ муҳожирларнинг давлат чегараси бўйлаб Польша билан чегарадаги муҳожирлар лагерга кўчиб келганини қайд этди.
Шу билан бирга, Беларусь парламентининг халқаро масалалар бўйича комиссияси раиси ўринбосари Олег Гайдукевич Польшани чегарани бузиб ўтган ҳамда чегара ёнида қолган барча қочқинларни қабул қилишга чақирди.
Аввалроқ бир гуруҳ болали аёллар Польша—Беларусь чегарасини ноқонуний кесиб ўтишга уринган. Польша хавфсизлик хизмати расмийларига кўра, Яқин Шарқдан келган қочқинларнинг ҳаракатлари бостирилган. Бундан ташқари, 12 ноябрь куни чегарадаги лагерга бир неча юз кишидан иборат янги муҳожирлар гуруҳи етиб келгани хабар қилинди.
11 ноябрь куни Буюк Британия, АҚШ ва Европа Иттифоқи давлатлари Беларусь ҳукуматини Польша—Беларусь чегарасидаги миграция инқирозини сунъий равишда яратганликда айблади.
8 ноябрь куни эрталаб Беларусь ва Европа Иттифоқи давлатлари чегарасида вазият кескинлашди. Беларусь оммавий ахборот воситалари мамлакатнинг Польша билан чегараси томонга ҳаракатланаётган муҳожирлар карвони акс этган видеоларни эълон қилди. Беларуснинг «БелТА» давлат агентлиги хабар беришича, муҳожирлар Польша орқали Германияга ўтиб олишни мақсад қилган.
Европа Иттифоқи ҳозирда Польша билан чегарадаги миграция инқирози туфайли Беларусга қарши санкцияларни кенгайтириш масаласини муҳокама қилмоқда. Минск муҳожирлар билан боғлиқ инқирозга ҳеч қандай алоқаси йўқлигини ва бу ҳолатга айнан Европа сиёсати сабаб бўлганини таъкидламоқда.
Изоҳ (0)