Украина президенти Владимир Зеленский Грузия бош вазири Ираклий Гарибашвили билан телефон орқали суҳбатда Грузиянинг ҳибсдаги собиқ президенти Михаил Саакашвилига нисбатан «номақул мажбурлов чораларини» қўллашга йўл қўйиб бўлмаслигини айтди. Бу ҳақда Украина давлат раҳбари матбуот хизматига таяниб, «ТАСС» хабар берди.
«Президент Украина фуқаросига (Михаил Саакашвили) нисбатан нома’қбул мажбурлов чораларини қўллашга йўл қўйилмаслигини таъкидлади», — дейилди хабарда.
Қайд этилишича, Зеленский Украина фуқароси Михаил Саакашвилининг ҳуқуқларини таъминлаш масаласини кўтарган ва «улар халқаро ҳуқуқ нормаларига мувофиқ тўлиқ кафолатланиши лозим»лигини таъкидлаган. Зеленский Михаил Саакашвилига унинг онаси ва қариндошлари, шунингдек, украиналик шифокорлар билан учрашиш имкониятини таъминлаш зарурлигига эътибор қаратган. «Украина ҳар доим ўз фуқароларининг қонуний ҳуқуқлари ва манфаатларини ҳимоя қилади», — таъкидлаган Зеленский.
Грузия Адлия вазирлигида 11 ноябрь куни Саакашвилининг қамоқхона касалхонасига мажбуран олиб кетилаётгани акс этган кадрларни чоп этилди. Видеода собиқ президентнинг қаршилик кўрсатишга уринаётгани, бироқ уни деярли кўтариб, қўл ва оёқларидан ушлаб олиб кетаётанини кўриш мумкин. Шундан сўнг Саакашвилининг адвокати собиқ президент очликни тўхтатишга қарор қилганини, чунки унинг норозилиги ўзига қарши «россияликлар ва амалдаги ҳукуматнинг қуролига айланиб бораётгани», унинг мажбурий касалхонага ётқизилгани акс этган тасвирлар Россия телеканалларида намойиш этилганини айтди.
1 октябрдан бери Рустави шаҳридаги қамоқхонада жазо муддатини ўтаётган Саакашвили 8 ноябрь куни Тбилисининг Глдани туманидаги қамоқхона касалхонасига етказилди. Грузия собиқ президентининг маълум қилишича, қамоқдан кўчирилганидан кейин уни калтаклашган. 8 ноябрь куни Украина Ташқи ишлар вазирлиги Грузия расмийларини собиқ президентни қамоқхона шифохонасидан фуқаролик шифохонасига ўтказишга чақирди.
Грузиянинг Украинадаги элчиси Георгий Закарашвили 9 ноябрь куни Украина Омбудсмани Людмила Денисова билан Саакашвили атрофидаги вазият бўйича мамлакат Ташқи ишлар вазирлиги билан қўшимча маслаҳатлашувлар ўтказиш зарурати юзасидан учрашиш таклифини қайтариб олди.
Аввалроқ Грузия бош вазири Саакашвилининг Украинага топширилмаслигини маълум қилганди.
Мавзуга доир:
- «Бу жиддий дипломатик низога сабаб бўлиши мумкин». Украина Саакашвилининг Грузияда ҳибсга олиниши юзасидан муносабат билдирди
- Тбилиси марказига ўн минглаб намойишчилар тўпланди. Улар Михаил Саакашвили озод этилишини талаб қилди (фоторепортаж)
- Грузия Давлат хавфсизлик хизмати Саакашвили давлат тўнтаришини режалаштиряпти деб ҳисобламоқда
- Грузия президенти ҳозирда қамоқда сақланаётган Саакашвилини ҳеч қачон афв этмаслигини маълум қилди
Изоҳ (0)