Turkmaniston prezidentiga paxta rejasi to‘liq bajarilgani haqida hisobot berildi

Turkmanistonda 11-noyabr kuni bo‘lib o‘tgan yig‘ilishda bosh vazirning agrosanoat kompleksi masalalari bo‘yicha o‘rinbosari Esenmurat Orazgeldiyev mamlakat prezidenti Gurbanguli Berdimuhamedovga 1 million 250 ming tonna miqdoridagi paxtani yig‘ishtirib olish rejasi to‘liq bajarilgani haqida hisobot berdi.

Turkmaniston davlat axborot agentligi xabariga ko‘ra, davlat rahbari alohida fidokorlik ko‘rsatgan paxtakorlarni davlat mukofotlari bilan taqdirlash bo‘yicha topshiriq berdi. Taqdirlash marosimini, shuningdek, 13-noyabr kuni “Mekan” saroyida Hosil bayrami munosabati bilan o‘tkaziladigan tantanalarni tayyorlash va olib borish parlament raisi Gulshat Mammedova, bosh vazir o‘rinbosari Orazgeldiev hamda Agrar partiya markaziy kengashi raisi Byashim Annagurbanovga yuklatildi.

Agentlikning yozishicha, Ashxobodga har bir viloyatdan bolalar olib kelingan, ular Turkmaniston prezidentiga “qishloq ahlining mehnatdagi g‘alabasini ifodalovchi” oppoq paxta bilan liq to‘ldirilgan xurjunlarni keltirgan va she’r o‘qigan. Berdimuhamedov ularga sovg‘a-salomlar topshirib, esdalik uchun suratga tushgan.

1-noyabr kuni viloyatlar rahbarlari bilan bo‘lib o‘tgan yig‘ilishda Gurbanguli Berdimuhamedov paxta terimini yakunlash muddati o‘tib ketayotganidan norozi bo‘lib, viloyatlarning ayrim tumanlarida “oq oltinni” yig‘ishtirib olish darajasi past ekanini aytgan.

Joriy yilda Berdimuhamedov “Mustaqillik bayramiga (27-sentabr) qadar rejalashtirilgan miqdordagi paxtani topshirish”ga farmoyish berib, “Hozirgi kunda asosiy vazifa — ushbu qutlug‘ sanaga qadar davlatga paxta topshirish bo‘yicha shartnoma majburiyatlarini bajarish” ekanini aytgan. Paxta rejasining bajarilgani to‘g‘risida 2020-yilda 5-noyabr kuni, 2019-yilda esa 8-noyabr kuni e’lon qilingandi.

Turkmaniston rahbari 20-sentabr kuni Mustaqillik bayrami munosabati bilan mansabdor shaxslarni mukofotlash haqida gapirar ekan, viloyat va tumanlar hokimlariga medallarni paxta hosili muvaffaqiyatli yig‘ib olingandan keyingina topshirish haqida topshiriq bergandi.