Оҳангаронда тезликни оширган Қирғизистон машинасининг жаримаси Тошкентдаги Trailblazer эгасига юборилди
Оҳангарон йўлида тезликни оширган Қирғизистон машинасининг жаримаси инспекторнинг эътиборсизлиги туфайли Тошкентдаги Trailblazer эгасига юборилди. Бу ҳақда ЙҲХББ матбуот хизмати хабар берди.
Маълум қилинишича, 31 август куни соат 22:58 да Қирғизистонга тегишли, давлат рақами 01 КG 737 АHА бўлган автомобиль Тошкент вилоятининг Оҳангарон тумани ҳудудидан ўтувчи М-39 автомобиль йўлининг 163-166 километрлари оралиғида 70 километр/соат тезлик чегараланган жойда 86 километр/соат тезликда ҳаракатлангани фото-видео мосламаси орқали аниқланган.
Тошкент вилояти ИИББ ЙҲХБ инспектори томонидан ҳуқуқбузарлик юзасидан Маъмурий жавобгарлик тўғрисидаги кодекснинг 128-3-моддаси (транспорт воситалари ҳайдовчиларининг белгиланган ҳаракат тезлигини ошириб юбориши) 1-қисми билан 245 минг сўм жарима солиш тўғрисида чиқарилган қарор юқорида кўрсатилган автомобилга эмас, балки Тошкент шаҳридаги МЧЖга тегишли, давлат рақами 01 737 АHА бўлган Trailblazer’га расмийлаштирилган.
Ўз хизмат вазифасига эътиборсизлик билан ёндашиб қабул қилинган қарор кенг жамоатчилик эътирозларига сабаб бўлган.
ЙҲХББ матбуот хизматининг қайд этишича, мазкур ҳолат юзасидан Тошкент вилояти ИИББ ЙҲХБ масъул ходимлари томонидан хизмат текшируви ўтказилмоқда.
