Ўзбекистон ИИВ ЙҲХББ ва ҳудудий бошқармалари хабар қилган йўл-транспорт ҳодисалари тафсилотларини тақдим этамиз.
Олмалиқ шаҳрида Matiz ҳайдовчиси пиёдани уриб юборди.
2021 йилнинг 9 ноябрь куни соат 16:45 ларда Тошкент вилояти, Олмалиқ шаҳар, Амир Темур кўчасида жойлашган «Боғишамол» кафесининг рўпарасида ҳайдовчи, А.М. (1997 йилда туғилган) Matiz автомобилида ҳаракатланиб келаётиб, пиёдалар ўтиш жойидан йўлни кесиб ўтаётган пиёда, 1975 йилда туғилган Ш.Т.ни уриб юборган.
Оқибатда пиёда Ш.Т. енгил тан жароҳати олиб шифохонага ётқизилган.
Мазкур ЙТҲ юзасидан Олмалиқ шаҳар ИИБ ЙҲХБ ходимлари томонидан суриштирув ҳаракатлари олиб борилмоқда.
Деновда икки Nexia тўқнашди
2021 йил 8 ноябрь куни соат 16:37 да Сурхондарё вилояти, Денов тумани, «Тасмасой» МФЙ ҳудудидан ўтувчи 4Р-100 автомобиль йўлининг 168-километрида ҳайдовчи, 1997 йилда туғилган Д.Р. Nexia автомобилида ҳаракатланаётиб, қувиб ўтиш қоидаларини бузиши оқибатида ҳайдовчи, 1987 йилда туғилган Ф.Б. бошқарувидаги Nexia автомобили билан тўқнашган ва бошқарувни йўқотиб йўл четидаги темир устунга урилган.
Оқибатда оқ рангли Nexia автомобилида бўлган йўловчи Г.Т. тан жароҳати олиб шифохонага ётқизилган.
Мазкур ЙТҲ юзасидан Денов тумани ИИБ ЙҲХБ ходимлари томонидан суриштирув ҳаракатлари олиб борилмоқда.
Автомобиль рақамини сигарет қутиси билан яширган ҳайдовчига чора кўрилди.
Ижтимоий тармоқда Nexia автомобилининг ҳайдовчиси давлат рақам белгисини сигарета қутиси билан кўринишини чеклагани акс этган фотолавҳа тарқалди.
Фотолавҳа юзасидан Сирдарё вилояти ИИБ ЙҲХБ ходимлари томонидан суриштирув ишлари олиб борилиб, қоидани бузган ҳайдовчи аниқланди.
Унга нисбатан Маъмурий жавобгарлик тўғрисидаги кодекснинг 125–5-моддаси (фойдаланиш белгиланган тартибда ман этилган транспорт воситаларини, шунингдек, давлат рақам белгиси ўзбошимчалик билан ечиб олинган транспорт воситаларини бошқариш) тартибида маъмурий баённома расмийлаштирилди.
Изоҳ (0)