АҚШ президенти Жо Байден 9 ноябрь кунги баёнотида Эронга қарши бир томонлама санкцияларни назарда тутадиган фавқулодда ҳолат режимини яна бир йилга узайтирувчи қарорни қабул қилди, деб хабар бермоқда «ТАCC».
Маълум бўлишича, Байден АҚШ ва Эрон муносабатлари ҳалигача нормаллашмагани, 1981 йил 19 январдаги икки томонлама келишувларни амалга ошириш жараёни ҳали ҳам давом этаётганини таъкидлаган. Ҳужжатда икки давлат ўртасидаги Жазоир масаласи, бир-бирининг ички ишларига аралашмаслик тамойиллари белгиланган.
«1979 йил 14 ноябрда эълон қилинган миллий фавқулодда ҳолат 2021 йил 14 ноябрдан кейин ҳам амалда бўлиши керак. Мен Эронга қарши миллий фавқулодда ҳолат режимини бир йилга узайтираман», — деган амалдаги АҚШ президенти.
Қайд этилишича, 1979 йил 14 ноябрда АҚШнинг 39-президенти Жимми Картер Эрон пойтахти Теҳронда америкаликларнинг гаровга олинишига жавобан 12170-сонли фармонни имзолаган. Бу орқали Эроннинг Қўшма Штатлардаги барча расмий холдинглари, жумладан, Америка банклари ва уларнинг хориждаги шўъба ва филиалларидаги ҳисоб рақамлари музлатилган.
1980 йил 7 апрелда Картер Теҳрон билан дипломатик алоқаларни узди ва мамлакатдан Эронга барча товарларни, жумладан, озиқ-овқат ва дори-дармонлар экспорт қилишни тақиқлади. Шунингдек, Эрондан АҚШга ҳар қандай товарлар олиб кирилишига эмбарго (бирор мамлакат ёки гуруҳ билан савдо муносабатларини тўла тақиқлаш) жорий этилди.
Эслатиб ўтамиз, шу йилнинг март ойида Байден Эронга қарши антитеррор санкциялар муддатини бир йилга узайтирганди. Шунингдек, Оқ уй АҚШнинг Эрон билан дипломатик алоқаларга очиқлиги, аммо санкцияларни юмшатмаслигини маълум қилган.
Изоҳ (0)