«Янги лойиҳаларга таклиф бўлгани йўқ». «Калмар ўйини» юлдузи Ли Жон-же сериалдан кейинги ҳаёти ҳақида сўзлаб берди

Жанубий Корея киноижодкорлари томонидан ишланган «Калмар ўйини» сериали экран юзини кўриши билан машҳурликка эришди. 900 миллион доллар даромад келтирган лойиҳани 17 кун ичида 111 миллион обуначи томоша қилган.

Сюжетга кўра, кредит берувчилардан яширинаётган 456 нафар қарздор ўз хоҳиши билан турли ўйинларда иштирок этади. Мағлуб бўлганларни шунчаки жазо эмас, ўлим кутади. Ғолибга эса 40 миллион доллар миқдорда пул берилади. Кинотанқидчилар сериални ижобий баҳолаётганига қарамай, бошқалар уни «Ҳаёт-мамот ўйинлари» билан таққослайди.

Сериалда бош қаҳрамонни гавдалантирган актёрлар саноқли кунлар ичида машҳурликка эришган. Актриса Хо Эн Чон шулар жумласидан. Уч ҳафта ичида Эн Чоннинг Instagram саҳифасини 13 миллион киши кузатишни бошлаган. Октябрнинг бошида эса у Louis Vuitton брендининг халқаро амбассадори бўлишга эришган. Аммо ҳамкасби Ли Жон-жега омад унчалик кулиб боқмаган. Variety журналига берган интервьюсида 48 ёшли актёр режиссёрлардан ҳеч қандай таклиф келиб тушмаганини маълум қилган.

«Менга ҳеч қандай таклиф келиб тушмади. Айни вақтда хорижий лойиҳаларда иштирок этиш режамда йўқ. Аммо тўғри келадиган таклиф бўлса, иштирок этишдан бахтиёр бўлардим. Бу қизиқ бўлиши мумкин», — деб таъкидлаган у. Ли Жон-женинг айтишича, у аввалига сериалнинг бунчалик машҳурликка эришишига ишонмаган, аммо кейинроқ ўз фикрини ўзгартирган.

«Мен сериалда ишлашни бошлаганимда бунчалик муваффақиятни кутмаган эдим. Аммо сценарий билан танишганда Кореядан ташқаридаги томошабинларни ҳам ўзига жалб қилиши мумкин бўлган нимадир борлигини тушунганман», — деган актёр.

Маълумот учун, Ли Жон-же ўз мамлакатида «Калмар ўйини» экран юзини кўришидан аввал ҳам машҳур бўлган. Модель сифатида фаолиятини бошлаган Ли Жон кинодаги карьерасини 1993 йилда «Динозавр-ўқитувчи (Dinosaur Teacher) номли драмада суратга тушишдан бошланган. Унинг арсеналида, шунингдек, «Янги олам» (Nеw wоrld), «Тик-так» ва «Ўғрилар» (The Thieves) фильмлари ҳам бор.