Шавкат Мирзиёев раислигида бўлиб ўтган видеоселектор йиғилишида давлат раҳбари сайловолди дастурига мувофиқ, 2022 йилнинг 1 январдан республиканинг 9 минг 259 та маҳалласида ҳоким ёрдамчилари иш бошлашини маълум қилди.
«Топшириғимга кўра, икки ҳафта давомида Худойбергенов [Турсинхон Худойбергенов - таҳ. ] бошчилигида ишчи гуруҳ Жиззах вилоятидаги 299 та маҳалланинг салоҳияти ва муаммоларини ўрганиб, улар учун энг муносиб номзодларни бирма-бир суҳбат асосида танлаб олди.
Шунингдек, Арнасой, Дўстлик, Зомин, Мирзачўл, Шароф Рашидов туманлари ва Жиззах шаҳрида туман ҳокимлари, ҳоким ўринбосарлари, маҳалла раислари ва танлаб олинган номзодлар учун амалий семинарлар ўтказилди.
Кеча ҳар битта вилоятга республикадан вакилларни юбордим. Улар ҳам икки ҳафта ичида ҳар бир ҳудудда ‘Жиззах намунаси’ асосида ишни ташкил қилади», – дейди Президент.
Мирзиёев вилоят ҳокимлари вакиллар билан бирга, ўн кун муддатда ҳар бир маҳалла бўйича ҳоким ёрдамчиси учун номзодларни аниқлаши бўйича топшириқ берди.
Бунда, номзоднинг билими, тажрибаси, ташаббускорлигига ҳамда у иш бошлайдиган маҳалланинг ўзига хослиги ва мавжуд имкониятларидан фойдалана олиш салоҳиятига алоҳида эътибор қаратиш зарурлиги қайд этилди.
Президент маслаҳатчиси ўринбосари Қаҳрамон Қуронбоев вилоят ҳокимлари билан бирга, 2021 йилнинг 15 декабригача танлаб олинган номзодларни ўқитиши ва зарур шароитлар яратиб бериши белгиланди.
Мавзуга доир:
Изоҳ (0)