Энергетика вазирлиги маълумотларига кўра, 2021 йилда сув танқислиги туфайли Ўзбекистондаги гидроэлектр станцияларида электр энергияси ишлаб чиқариш ҳажми қарийб 23 фоизга камайди.
«ГЭСларда сув ҳажмининг камлиги сабабли электр энергияси ишлаб чиқариш кўрсаткичлари камайиши кузатилмоқда ва бунинг натижасида айрим ҳудудларда электр энергияси таъминотида қисқа муддатли узилишлар кузатилмоқда.
Бу гидроэлектр станцияларида электр энергияси ишлаб чиқаришнинг қисқариши билан боғлиқ бўлиб, бу эҳтиёжни тўлиқ қоплаш учун зарур миқдорда электр энергияси етишмаслигига олиб келди», — деб қайд этган вазирлик.
Маълум қилинишича, 2019 йилда гидроэлектр станцияларда ишлаб чиқариш 6,5 миллиард киловатт-соатни ташкил этган, 2021 йилда бу кўрсаткич ўтган йилги кўрсаткич каби 5 миллиард киловатт-соат ёки 1,5 миллиард киловатт-соатга кам (23 фоиз)ни ташкил этмоқда.
Мазкур 1,2 миллиард киловатт-соат электр энергия билан республика аҳоли истеъмолчиларини бир ой мобайнида узлуксиз электр энергияси билан таъминлаш мумкин.
«Жорий йилда сув омборларида белгиланган сув захиралари тўпланмагани нафақат Ўзбекистон, балки қўшни республикаларда ҳам кузатилмоқда. Шунга қарамасдан мамлакатимизда мавжуд барча имкониятлардан фойдаланган ҳолда, электр станциялар орқали режада кўрсатилган ҳажмларда электр энергияси ишлаб чиқариш чоралари кўрилмоқда», — деб таъкидланган Энергетика вазирлиги хабарида.
Эслатиб ўтамиз, Қирғизистон Марказий Осиёдаги қўшниларини кутилаётган сув танқислигидан огоҳлантирганди. Қирғизистон энергетика ва саноат вазири ўринбосари Таалайбек Ибраев Қирғизистоннинг Жалолобод вилоятида жойлашган «Тоқтогул» сув омборининг сув сатҳи «ўлик чегара» даражасигача тушиши эҳтимоли борлигини, бу ҳолат сув омборига туташ дарёлар оқиб ўтадиган қўшни мамлакатларга ўзининг салбий таъсирини кўрсатишини маълум қилган.
Қирғизистонлик амалдор вазиятни ўнглаш учун Қирғизистон электр энергетика тизимига қўшни давлатлардан ёрдам олиш зарурияти мавжудлигини қайд этган.
Изоҳ (0)