Президентликка сайланган Шавкат Мирзиёевнинг инаугурация маросими 6 ноябрь куни бўлиб ўтиши расман маълум қилинди.
Олий Мажлис Қонунчилик палатасининг хабар беришича, Олий Мажлис Қонунчилик палатаси ва Сенатнинг Ўзбекистон Республикаси сайланган Президентининг лавозимига киришишига бағишланган қўшма мажлиси 6 ноябрь куни соат 11:00 да Тошкент шаҳрида Олий Мажлис Сенатининг янги биноси катта мажлислар залида бўлиб ўтади.
Эслатиб ўтамиз, 29 октябрь куни Марказий сайлов комиссияси Шавкат Мирзиёевни кейинги беш йилга Ўзбекистон Президенти лавозимига сайланган деб ҳисоблаш тўғрисида қарор қабул қилганди. Сайлов кодексига кўра, Ўзбекистон Президенти Марказий сайлов комиссияси томонидан Президент сайлови натижалари расмий равишда эълон қилинган кундан эътиборан кечи билан икки ой ичида Олий Мажлис палаталарининг қўшма мажлисида қасамёд қилган пайтдан эътиборан ўз лавозимига киришади.
Ўзбекистон Сенатининг Ислом Каримов шоҳкўчаси, 9-уй манзилида (Ташқи ишлар вазирлигининг собиқ бош қароргоҳи ўрнида) жойлашган янги биноси олдида кенг кўламли ободонлаштириш ва таъмирлаш ишлари олиб борилди.
Сенатнинг эски биноси Мустақиллик майдонида жойлашган эди. 2018 йил ёзида Ташқи ишлар вазирлиги Халқ банкининг эски (собиқ Тошкент ҳокимлиги) биносига кўчиб, ТИВ биносига эса Сенат кўчиб ўтиши маълум бўлган эди.
Бироқ орадан кўп ўтмай, Сенат аппарати ходимлари ва сенаторлар Мустақиллик майдонидаги ўз биносига қайтганди. Бунга сабаб сифатида ТИВнинг собиқ биноси жиддий таъмирга муҳтожлиги, у ерда Сенатнинг «нормал ишлаши ва тадбирларни ўтказиши учун шароит йўқ»лиги кўрсатилганди.
2021 йил бошида таъмирланаётган бинони президент Шавкат Мирзиёев кўздан кечирганди. Ўшанда Олий Мажлис палаталарининг қўшма мажлисини ўтказиш учун 280 ўринли зал ташкил этилаётгани, у миллий нақшлар билан безатилиб, замонавий техникалар билан жиҳозланаётгани маълум қилинган эди.
Изоҳ (0)