Футбол бўйича Европа Конференциялар Лигасининг 4-туридан ўрин олган ўйинда «Рома» 4 ноябрь, пайшанба куни «Будё/Глимт» билан баҳс юритди.
Римда ўтган ўйинда жамоалар 2:2 ҳисобидаги дурангга имзо чекди. Дастлаб, меҳмонлар биринчи бўлимга қўшиб берилган дақиқаларда ҳисобни очди. «Бўрилар» бунга 54-дақиқада Стефан аш-Шааравининг ажойиб голи билан жавоб қайтарди. 65-дақиқага келиб, меҳмонлар яна бир бор «Рома» дарвозасини ишғол қилди ва ҳисобда олдинга чиқиб олди, қанотдан оширилган тўпни Эрик Ботхейм боши билан дарвозага жойлаб қўйди. Ўйин якунлаши арафасида «Рома» мағлубиятдан қутулиш учун қатор ҳужумлар уюштирди ва 84-дақиқада ўз самарасини берди. Рожер Ибанес гол уриб, жамоасини мағлубиятдан қутқариб қолди.
Учрашувда «Рома»нинг ўзбекистонлик ҳужумчиси Элдор Шомуродов 67-дақиқада захирадан майдонга туширилди ва жамоасининг сўнгги дақиқалардаги ҳужумларида фаол иштирок этди.
Учрашувдаги голлар видеосини бу ерда кўриш мумкин — ҳавола.
Ушбу дурангдан кейин «Будё/Глимт»нинг очколари 8 тага етди, жамоа C гуруҳида пешқадамлик қилмоқда. «Рома» эса 7 очко билан 2-ўринни банд этган.
«Тоттенҳэм» Антонио Конте қўл остидаги илк ўйинда ўз майдонида «Витесс»дан 3:2 ҳисобида устун келди.
Конференциялар Лигаси
4-тур баҳслари
4 ноябрь, пайшанба
«Рома» Италия — «Будё Глимт» 2:2
Голлар: 0:1 – 45 Солбаккен, 1:1 – 54 аш-Шаарави, 1:2 – 65 Ботхейм, 2:2 – 84 Рожер.«Рома» – Руй Патрисиу, Карсдорп, Кристанте, Манчини, Рожер, Мхитарян (Карлес Перес, 46), Верету, Занёло (Шомуродов, 67), Дарбо (Вильяр, 46), аш-Шаарави (Залевски, 88), Абраҳам (Майораль, 81).
«Будё/Глимт» – Ҳайкин, Сампстед, Моэ, Лоде, Беркан, Конрадсен (Ветлесен, 88), Фет, Ҳаген, Пеллегрино (Мугиша, 88), Ботхейм, Солбаккен.
Огоҳлантиришлар: Кристанте (75), Ҳайкин (75), Рожер (78), Солбаккен (80), Моэ (87).
Изоҳ (0)