Беларусь конституцияси бўйича референдум 2022 йилнинг февралида ўтказилади. Бу ҳақда мамлакат президенти Александр Лукашенко Иттифоқ давлати Олий давлат кенгаши йиғилишида маълум қилди, деб хабар беради «РБК».
«Яқинда Россияда конституцион ислоҳот ўтказилди ва қайта ташкил этиш ва тартибга солишнинг улкан режалари белгилаб берилди. Бунинг ортидан Беларусь ҳам конституцион ислоҳот ўтказишга тайёрланмоқда. Ўйлайманки, февраль ойида», — дейди Лукашенко.
Унинг сўзларига кўра, Беларуснинг «тартибли ҳаракати гарови» айнан халқ референдумидир.
2020 йилнинг июнида республикада президентлик сайловларига икки ой қолганда Лукашенко биринчи бор конституцияга ўзгартириш киритишга тайёргарлик кўрилаётганини эълон қилганди. Президентнинг айтишича, ушбу чора мамлакат ичидаги ўзгаришлар учун биринчи қадам бўлиши керак эди.
Эслатиб ўтамиз, Беларусда 2020 йил 9 августда бўлиб ўтган президентлик сайловларидан кейин бошланган норозилик намойишлари фонида Лукашенко конституцияга ўзгартириш киритиш зарурати ва президентлик ваколатларининг бир қисмини ҳокимиятнинг бошқа тармоқлари фойдасига қайта тақсимлашга тайёрлигини маълум қилди. Конституциявий суд раиси ва Конституциявий комиссия раҳбари Петр Миклашевичнинг сўзларига кўра, асосий қонуннинг 53 моддасига ўзгартиришлар киритиш ва унга 14 та янги моддани қўшиш таклиф қилинмоқда. «Мен ҳеч қандай конституцияни ўзимга мослаштирмайман. Янги конституция қабул қилингач, мен сиз билан президент сифатида ишламайман», — деганди у ўшанда.
Аввалроқ Лукашенкога Беларусь конституциясининг янги таҳрири тақдим этилгани, ўзгартиришларнинг мазмун-моҳияти давлат раҳбари, парламент ва ҳукуматнинг функция ва ваколатларини белгиловчи президентлик бошқаруви шаклини сақлаб қолишдан иборатлиги тўғрисида хабар берилганди. Парламентнинг қонун чиқарувчи функциясини тўлиқ белгилаш, унинг назорат ва кадрлар ваколатларини кенгайтириш кўзда тутилган. Бундан ташқари, ҳукумат ваколатларини ва унинг ижро ҳокимияти соҳасида қарорлар қабул қилишдаги мустақиллигини кенгайтириш таклиф этилмоқда.
Изоҳ (0)