АҚШ президенти Жо Байден администрацияси Саудия Арабистонига 650 миллион долларлик қурол-яроғларни сотиш борасидаги битимни маъқуллади, деб хабар беради «Интерфакс».
2018 йил охирида АҚШ Сенати Саудия Арабистонини Яман билан можарода қўллаб-қувватлашни тўхтатиш ва Саудия Арабистони валиаҳд шаҳзодаси Муҳаммад бин Салмон журналист Жамол Қошиқчининг ўлдирилишида жавобгарлиги борасидаги резолюцияни маъқуллаган эди.
АҚШнинг ўша вақтдаги президенти Дональд Трамп Саудия Арабистонини қўллаб-қувватлашни тўхтатиш борасидаги резолюцияга вето қўйган ва валиаҳд шаҳзоданинг Қошиқчи ўлимига алоқаси маълум бўлса-да, қурол сотишни давом этган.
АҚШ давлат котиби Энтони Блинкен февраль ойида Байден Саудия Арабистони билан ҳамкорлик Америка қадриятларини акс эттириши кераклигини айтганини маълум қилганди. Унинг қўшимча қилишича, Вашингтон «Саудия Арабистонининг фаоллар, диссидентлар ва журналистларга қарши экстерриториал таҳдид ва ҳужумларини тўхтатиш» зарур ва Қўшма Штатлар бунга тоқат қилмайди.
Ўша ойнинг ўзида Байден Саудия Арабистонининг Яманга ҳужумини қўллаб-қувватлашни расман тўхтатган. Шу билан бирга, Вашингтон Ар-Риёдни минтақадаги муҳим иттифоқдош сифатида кўришда давом этмоқда.
Маълумот учун, Яманда 2014 йил августидан бери фуқаролар уруши давом этмоқда. Унда Саудия Арабистони томонидан қўллаб-қувватланаётган амалдаги президент Абд Раббу Мансур Ҳодий бир томон, исёнчи хусийлар иккинчи томон бўлиб кураш олиб бормоқда.
Изоҳ (0)