БМТнинг иқлим саммитида 40 дан ортиқ давлат кўмирдан фойдаланишни камайтириш тўғрисида шартнома имзолади

Бирлашган Миллатлар Ташкилотининг иқлим бўйича конференцияси (COP26) давомида 40 дан ортиқ мамлакатлар янги кўмир электростанцияларини молиялаштиришни тўхтатиш тўғрисидаги декларацияни имзолади. Шунингдек, шартномада мавжуд станцияларни — ривожланган мамлакатларда 2030 йилларда, ривожланаётган мамлакатларда эса 2040 йилларда ёпиш кўзда тутилган.

Шартномага имзо чеккан давлатлар қаторида Польша, Вьетнам, Индонезия, Чили каби йирик кўмир истеъмолчилари ҳам бор. Шу билан бирга, конференция веб-сайтидаги маълумотларга кўра, энг йирик кўмир истеъмолчилари — Хитой, АҚШ, Ҳиндистон, Австралия ҳали халқаро битимда иштирок этмаяпти.

Битим карбонат ангидридни ушлаб қолувчи технологиялардан фойдаланмайдиган кўмирда ишлайдиган электростанцияларга тааллуқли. Конференцияга мезбон бўлган Буюк Британия тадбирга тайёргарлик жараёнида кўмирдан фойдаланишни қисқартириш масаласини асосий мавзу қилиб қўйганди. Кўмир ёқиш дунёдаги иссиқхона газларининг энг катта манбаи ҳисобланади.

Буюк Британия бош вазири Борис Жонсон иқлим конференциясида сўзлаган нутқида иқлим муаммоларини ҳал қилиш узоқ вақт талаб қилишини айтди. Жонсон иқлим ўзгаришига қарши курашни футбол ўйинига қиёслади ва бу ўйинда инсоният 5:1 ҳисобида мағлуб бўлаётганини таъкидлади.

COP26 Буюк Британиянинг Глазго шаҳрида 31 октябрда бошланган ва 12 ноябргача давом этади. Унда 200 га яқин давлатдан вакиллар иштирок этиши кутилмоқда. Иқлим бўйича саммит доирасида дастлаб дунёнинг 100 дан ортиқ етакчилари 2030 йилга бориб ўрмонларнинг йўқолиб кетиши жараёнини тўхтатишга келишиб олди.

Эслатиб ўтамиз, иқлим бўйича саммит бошланишидан бир неча кун олдин Глазго шаҳрида кучли ёмғир ёғиб, кўчаларни сув босган эди.