АҚШ разведкасининг минглаб ходимлари эмланишдан бош тортгани учун ишдан бўшатилиши мумкин

АҚШ ҳукуматининг коронавирусга қарши мажбурий вакцинация тўғрисидаги қарорига риоя қилмаган разведка ходимлари ишдан бўшатилиши мумкин. Бу 100 ва ундан ортиқ ходимга эга компанияларга тааллуқли, дея хабар берди «Коммерсантъ» Associated Press’га таяниб.

Конгрессменлар ва сенаторлар миллий хавфсизлик учун муҳим бўлган ходимларнинг ишдан четлатилишидан хавотирда. АҚШ Республикачилар партиясининг Миллий қўмитаси маъмурият қарорига эътироз билдириш учун судга мурожаат қилишини маълум қилди, дейилади хабарда.

Аввалроқ АҚШ Меҳнатни муҳофаза қилиш ва хавфсизлик бошқармаси (ОSHА) мамлакатдаги 100 дан ортиқ ишчиси  бўлган барча компанияларга 2022 йил 4 январгача ўз ходимларини коронавирусга қарши эмлашни буюрган эди. Компаниялар, шунингдек, эмланмаган ходимлардан камида ҳафтасига бир марта коронавирусга топширилган тестнинг салбий натижасини  талаб қилиши лозим.

Маълумот учун, Pfizer ёки Moderna вакциналарининг иккита компонентини ёки Johnson & Johnson препаратининг бир дозасини олган кишилар коронавирусга қарши тўлиқ эмланган ҳисобланади.

1 ноябрь куни Нью-Йорк шаҳрида 10 000 дан ортиқ полиция, ўт ўчирувчилар ва бошқа ходимлар шаҳар мерининг барча шаҳар ишчиларини COVID-19 га қарши эмлаш бўйича топшириғига риоя қилмагани учун ҳақ тўланмайдиган таътилга жўнатилганди. Нью-Йоркдаги 2,3 мингга яқин ўт ўчирувчи эмланишни истамаётгани учун касаллик таътилига чиққан. Ходимлар етишмовчилиги туфайли шаҳардаги 18 та ўт ўчириш станцияси ёпилган.

Аввалроқ, 20 октябрь куни АҚШ Касалликларни назорат қилиш ва олдини олиш маркази (CDC) раҳбари Рошел Валенски илгари Европанинг бир қанча давлатларида аниқланган AY.4.2.— коронавирус дельта штаммининг янги варианти АҚШда қайд этилаётганини маълум қилганди. Бироқ ҳозирда АҚШда унинг ёйилиши ёки у билан касалланиш ҳолатларининг кўпайиши ҳақида маълумот йўқ.

Коронавируснинг биринчи бўлиб Буюк Британияда аниқланган янги AY.4.2 штамми ҳақидаги маълумотлар 19 октябрь куни Financial Times саҳифаларида пайдо бўлди. Ушбу мутация «ҳиндча» штаммга нисбатан 10-15 фоизга юқумлироқ бўлиши мумкин, дея огоҳлантирди Кембриждаги Сенгер институти ҳамда Лондон университет коллежининг Генетика институти мутахассислари.