Судан ҳарбий етакчиси генерал Абдул Фаттоҳ ал-Бурҳон тўрт нафар вазирни озод қилиш бўйича топшириқ берди, деб хабар беради «Коммерсантъ». Улар давлат тўнтариши вақтида қўлга олинган эди. Вазирларнинг вакили Associated Press агентлигига маълум қилишича, ҳозирча улар озод этилмаган.
Ҳибсдан маданият ва ахборот вазири Ҳамза Балюл, алоқа ва рақамлаштириш вазири Ҳошим Хасаб ар-Расул, савдо ва таъминот вазири Али Гедо ҳамда ёшлар ва спорт вазири Юсуф Одам озод этилиши керак бўлган.
«Интерфакс»нинг ёзишича, АҚШ давлат котиби Энтони Блинкен Судан ҳарбий ҳокимияти фуқаролик ҳукуматини қайта тиклаши ва барча қўлга олинганларни озод этиши кераклигини маълум қилган.
Таъкидланишича, АҚШ давлат котиби «Бурҳонни 25 октябрь куни қўлга олинган барча сиёсий арбобларни зудлик билан озод этишга ва бош вазир Хамдокни ҳокимиятга қайтадиган ҳамда Суданда фуқаролик бошқарувини қайта тиклайдиган диалогга қайтишга чақирган».
Давлат котиби Судан ҳарбийлари АҚШ билан шерикликни қайта тиклаш борасидаги зарур ҳаракатларни амалга оширишига умид қилган.
Эслатиб ўтамиз, Судан ҳарбийлари 25 октябрга ўтар кечаси мамлакат муваққат ҳукуматининг бир қатор вазирларини, жумладан, муваққат бош вазир Абдулла Хамдокни ҳибсга олганди. Хамдок ҳамда унинг рафиқасига 27 октябрь — ҳисбга олинганидан бир кун ўтиб уйига қайтишга рухсат берилган эди.
Суданда ҳарбийлар ва фуқаролик кучлари ўртасидаги муносабатларда инқироз бир неча ҳафтадан бери давом этмоқда. Зиддиятларни мулоқот орқали ҳал қилишга уринишлар кутилган натижага олиб келмаган, қарама-қарши лагерлар ўз тарафдорларини кўчаларга олиб чиққан. Норозилик намойишлари оқибатида етти киши ҳалок бўлган ва юздан ортиқ одам жароҳат олгани айтилмоқда.
Изоҳ (0)