«Замин» фонди васийлик кенгаши раиси Зироат Мирзиёева Жиззах вилоятига ташрифи давомида Зарбдор туманидаги 1 ва 2-сонли мактабларда бўлди, деб хабар бермоқда фонд матбуот хизмати.
Маълум қилинишича, ташриф давомида «Замин» фонди эшитиш қобилияти заиф болалар таълимини қўллаб-қувватлаш дастури доирасида мактабларга замонавий FМ тизимларини совға қилди.
«Олдимизда турган муҳим вазифалардан бири, сиз ўзингизни намоён қилишингиз учун зарур шароитларни яратиб бериш. Ўқишда, ишда, ижодда, спортда, ижтимоий фаолиятда ўзингизни топа олишингизни истаймиз. Қобилиятингиз, қизиқишларингизни юзага чиқаришда ҳеч қандай тўсиқ бўлмасин, деймиз», — деган Зироат Мирзиёева ўқувчилар билан учрашувда.
У, шунингдек, ҳар бир бола таълим олишда тенг ҳуқуқли бўлиши, ўз салоҳиятини юзага чиқариш имкониятига эга бўлиши зарурлигини таъкидлади.⠀
«Муҳим вазифаларимиздан бири — инклюзив жамиятни яратиш. Сиз ўз маҳоратингизни ошириб, сифатли таълим олишингиз ва тўсиқларсиз жамиятга янада мослашишингизни истаймиз», — деган Зироат Мирзиёева.
Қайд этилишича, 2021 йилда Қорақалпоғистон Республикаси, Жиззах, Қашқадарё, Бухоро, Фарғона ва Андижон вилоятларида жойлашган 8 та ихтисослаштирилган мактабларда ана шундай жиҳозлар ўрнатилади. 2022 йил охиригача Республика бўйлаб барча 18 та мактаб тўлиқ жиҳозланиши кутилмоқда. Шу билан бир қаторда, ўқув жараёнида жиҳозлардан фойдаланиш бўйича ҳам ўқитувчилар учун хорижлик мутахассислар томонидан махсус тренинглар ўтказилмоқда.
FМ тизими керакли товушларни бевосита ўқувчининг эшитиш аппаратларига узатаётгани туфайли болалар ўқитувчининг гапини эшитади ва нутқни синфда ҳам, шахсий дарсларда ҳам ривожлантиради.
Самарадорликни таъминлаш мақсадида «Замин» фонди кўмагида ихтисослаштирилган мактабларнинг 2 минг нафар ўқувчисига 2 донадан замонавий эшитиш аппарати бепул топширилмоқда. Шу билан бирга, бир гуруҳ мутахассислар болаларнинг эшитиш қобилиятини диагностика қилиш ва эшитиш воситаларини индивидуал созлашни амалга оширмоқда.
Эслатиб ўтамиз, 2020 йилнинг ноябрида болалар таълимига бағишлаб ўтказилган халқаро веб-форумда нутқ сўзлаган Зироат Мирзиёева болалар ҳар хил бўлгани билан уларнинг ҳуқуқлари тенг бўлиши лозимлигини таъкидлаганди.
Шу йили «Замин» фонди Соғлиқни сақлаш вазирлиги ва Республика ихтисослаштирилган педиатрия илмий-амалий тиббиёт маркази билан ҳамкорликда эшитиш қобилиятининг скринингини ўтказиш синов лойиҳасини бошлади, шунингдек, эшитиш қобилиятини йўқотганларга кохлеар ва суяк имплантларини ўрнатиш бўйича фонд кўмагида 36 та жарроҳлик амалиёти ўтказилди.
Изоҳ (0)