“Zamin” fondi vasiylik kengashi raisi Ziroat Mirziyoyeva Jizzax viloyatiga tashrifi davomida Zarbdor tumanidagi 1 va 2-sonli maktablarda bo‘ldi, deb xabar bermoqda fond matbuot xizmati.
Ma’lum qilinishicha, tashrif davomida “Zamin” fondi eshitish qobiliyati zaif bolalar ta’limini qo‘llab-quvvatlash dasturi doirasida maktablarga zamonaviy FM tizimlarini sovg‘a qildi.
“Oldimizda turgan muhim vazifalardan biri, siz o‘zingizni namoyon qilishingiz uchun zarur sharoitlarni yaratib berish. O‘qishda, ishda, ijodda, sportda, ijtimoiy faoliyatda o‘zingizni topa olishingizni istaymiz. Qobiliyatingiz, qiziqishlaringizni yuzaga chiqarishda hech qanday to‘siq bo‘lmasin, deymiz”, — degan Ziroat Mirziyoyeva o‘quvchilar bilan uchrashuvda.
U, shuningdek, har bir bola ta’lim olishda teng huquqli bo‘lishi, o‘z salohiyatini yuzaga chiqarish imkoniyatiga ega bo‘lishi zarurligini ta’kidladi.⠀
“Muhim vazifalarimizdan biri — inklyuziv jamiyatni yaratish. Siz o‘z mahoratingizni oshirib, sifatli ta’lim olishingiz va to‘siqlarsiz jamiyatga yanada moslashishingizni istaymiz”, — degan Ziroat Mirziyoyeva.
Qayd etilishicha, 2021-yilda Qoraqalpog‘iston Respublikasi, Jizzax, Qashqadaryo, Buxoro, Farg‘ona va Andijon viloyatlarida joylashgan 8 ta ixtisoslashtirilgan maktablarda ana shunday jihozlar o‘rnatiladi. 2022-yil oxirigacha Respublika bo‘ylab barcha 18 ta maktab to‘liq jihozlanishi kutilmoqda. Shu bilan bir qatorda, o‘quv jarayonida jihozlardan foydalanish bo‘yicha ham o‘qituvchilar uchun xorijlik mutaxassislar tomonidan maxsus treninglar o‘tkazilmoqda.
FM tizimi kerakli tovushlarni bevosita o‘quvchining eshitish apparatlariga uzatayotgani tufayli bolalar o‘qituvchining gapini eshitadi va nutqni sinfda ham, shaxsiy darslarda ham rivojlantiradi.
Samaradorlikni ta’minlash maqsadida “Zamin” fondi ko‘magida ixtisoslashtirilgan maktablarning 2 ming nafar o‘quvchisiga 2 donadan zamonaviy eshitish apparati bepul topshirilmoqda. Shu bilan birga, bir guruh mutaxassislar bolalarning eshitish qobiliyatini diagnostika qilish va eshitish vositalarini individual sozlashni amalga oshirmoqda.
Eslatib o‘tamiz, 2020-yilning noyabrida bolalar ta’limiga bag‘ishlab o‘tkazilgan xalqaro veb-forumda nutq so‘zlagan Ziroat Mirziyoyeva bolalar har xil bo‘lgani bilan ularning huquqlari teng bo‘lishi lozimligini ta’kidlagandi.
Shu yili “Zamin” fondi Sog‘liqni saqlash vazirligi va Respublika ixtisoslashtirilgan pediatriya ilmiy-amaliy tibbiyot markazi bilan hamkorlikda eshitish qobiliyatining skriningini o‘tkazish sinov loyihasini boshladi, shuningdek, eshitish qobiliyatini yo‘qotganlarga koxlear va suyak implantlarini o‘rnatish bo‘yicha fond ko‘magida 36 ta jarrohlik amaliyoti o‘tkazildi.
Izoh (0)