Ўзбекистонда мобил VPN’лар яна кескин оммалашиб кетди. Бу ҳақда App Annie мобил таҳлилий сервиси маълумотларига таяниб, Spot хабар берди.
App Store’да VPN-дастурлар дастлабки еттита ўринни эгаллаган:
Таъкидлаш керакки, бир кун олдин ушбу мобил дастурларнинг айримлари ҳатто топ-50 таликка ҳам кирмаган. Google Play’да эса кескин ўзгаришлар содир бўлмаган. Унда VPN-дастурлар олдингидек 25-ўринни эгалламоқда.
3 ноябрь куни Ахборотлаштириш ва телекоммуникациялар соҳасида назорат бўйича давлат инспекцияси («Ўзкомназорат») Telegram, YouTube, Instagram, Facebook, «Одноклассники»нинг Ўзбекистондаги фаолиятини чеклади. Кейинроқ Ўзбекистон бош вазири Абдулла Ариповнинг қарорига асосан «Ўзкомназорат» бошлиғи Ғолибшер Зияев нотўғри ва келишилмаган хатти-ҳаракатлари учун эгаллаб турган вазифасидан четлатилгани маълум бўлди ва ижтимоий тармоқларга уланиш тикланди.
Бироқ 2021 йил июль ойи аввалида фаолияти чекланган TikTok, Twitter, Skype, «ВКонтакте»га ҳамон VPN’сиз кириб бўлмаяпти. Ўшанда ҳам Ўзбекистонда мобил VPN бирданига оммалашиши кузатилган эди.
Ижтимоий тармоқларга чекловлар ўрнатилгандан сўнг турли хил Telegram каналларда Ўзбекистонда VPN’дан фойдаланганлик учун жиноий жавобгарлик борлиги тўғрисида маълумотлар тарқалган. Аммо бу ундай эмас.
2018 йилда ҳақиқатан ҳам жавобгарлик жорий этилган эди, аммо телекоммуникация тармоғига ноқонуний кириш учун — бунинг VPN билан ҳеч қандай алоқаси йўқ. Шундан сўнг Ахборот технологиялари ва коммуникацияларини ривожлантириш вазирлиги мазкур фарқни батафсил баён қилган эди.
Ўз навбатида, депутат Расул Кушербаев ахборот асрида ижтимоий тармоқларни чеклашни кулгили ва абсурд қарор деб атади.
2019 йил ёзида ўша пайтдаги Президент Администрацияси ҳузуридаги Ахборот ва оммавий коммуникациялар агентлигининг директори Комил Алламжонов Alter Ego лойиҳасига берган интервьюсида YouTube ва Facebook’ка чекловлар қўйганлар энди «қамоқда» эканликларини таъкидлаган. Унинг сўзларига кўра, шу йўл билан улар салбий маълумотлар оқимини камайтиришга ҳаракат қилган.
Комил Алламжоновнинг таъкидлашича, интернетни ўчириб қўйиш орқали ҳеч нарсага эришиб бўлмайди. Бундан ташқари, VPN’ларнинг тобора оммалашиб бориши кўплаб керак бўлмаган манбаларга кириш имкониятини очади ва шу билан хавфсизлик тизимларини йўқ қилади.
Изоҳ (0)