Тошкент вилояти Паркент туманида жойлашган хонадонларнинг бирида шерлар боқилаётгани маълум бўлди. Бу ҳақда Telegram’даги «Ekologuz» канали хабар берди.
Маълум қилинишича, мурожаат бўйича «Меҳр ва оқибат» ҳайвонларни ҳимоя қилиш ННТ вакили, Паркент туман Экология бошқармаси вакиллари билан ушбу хонадонга ташриф буюрилган.
Аниқланишича, Красногорс шаҳарчасидан чиқиб кетишдаги дала ҳовлиларнинг бирида иккита шер (эркак ва урғочи) ва уларнинг боласи боқилмоқда. Таъкидланишича, шерлар тор, қоронғи ертўласимон жойда сақланяпти, боласининг бир кўзи парда билан қопланган. У ота-онасидан ажратиб олинган.
Уй эгасининг айтишича, шерлар Андижон ҳайвонот боғидан сотиб олинган бўлиб, барча ҳужжатлари мавжуд (аммо уларни тақдим этмаган) ва улар Красногорскда хусусий ҳайвонот боғини очиш ҳаракатида.
«Аммо ҳали боққа ер ажратилмаган. Шерларнинг қорни тўқдир балки, аммо 2 йилдан буён қоронғи жойда сақланаётган шерларни кўриб, юрагим эзилиб кетди. Ҳайвонот боғи очилган тақдирда ҳам бор-будини бугунги кунда шерларнинг қорнини тўйдиришга сарфлаётган оила аъзолари ундан қанчалик даромад ола олишади? (Ёпилган Навоий ҳайвонот боғига кириш 5000 сўм эди. Албатта, келаётган даромад билан ҳайвонларнинг қорнини тўйдириб бўлмасди)», — деб ёзади пост муаллифи.
Канал муаллифи ҳайвонот боғи очилгунга қадар шерлар Тошкент ҳайвонот боғига кўчириш таклифини бериб, ҳайвонлар тақдирига Экология қўмитаси ва Экопартия бефарқ қолмаслигига умид билдирган.
Эслатиб ўтамиз, 2020 йилда Навоий вилояти прокуратураси «Меҳр ва оқибат» ҳайвонларни ҳимоя қилиш жамиятининг мурожаатига асосан хусусий ҳайвонот боғи директори Соҳиба Барноевага нисбатан ҳайвонларни сақлашдаги қонунбузарлигига оид ишни кўриб чиқиб, 21 декабрь куни хусусий боғ директорига нисбатан огоҳлантириш эълон қилган ва барча камчиликларни бартараф этишга беш кун муҳлат берганди. Берилган муддат ичида қонунбузарлик ҳолатлари бартараф этилмаса, иш қайта кўриб чиқилади. Ушбу ҳайвонот боғида сақланган ҳайвонлар реабилитация учун Тошкентга олиб келинган.
Изоҳ (0)