Португалия давлат кенгаши кўпчилик овоз билан президент Марселу Ребелунинг парламентни тарқатиб юбориш ва муддатидан олдин сайловлар ўтказиш борасидаги таклифини маъқуллади. Давлат раҳбари бу борадаги тегишли қарорни имзолаши керак, деб хабар беради «Коммерсантъ».
Парламентнинг тарқатиб юборилишига Португалия коммунистик партияси ва Сўллар блоки бюджет лойиҳасини қўллаб-қувватлашни рад этгани сабаб бўлган. Президент овоз бериш жараёнларидан олдин депутатлар бюджетни қўллаб-қувватламаса, бошқа танлови йўқлиги ҳақида огоҳлантирган.
Аввалроқ мамлакат иқтисодиёт вазири Педро Сиза Виeйра муддатидан олдинги сайловлар «боши берк кўча»дан чиқишнинг энг яхши вариантига айланиши мумкинлигини айтганди. У ҳукумат олдингидек ўз мақсадларига эришишни давом этишини таъкидлаган. Шу билан бирга, Reuters’нинг маълум қилишича, парламентнинг тарқатиб юборилиши сиёсий иложсизликдан чиқишга ёрдам бермайди, чунки бирорта сиёсий куч барқарор кўпчиликка умид қила олмайди.
Эслатиб ўтамиз, 2021 йилнинг январида Марселу Ребелу де Соуза Португалия президенти лавозимига қайта сайланганди.
Изоҳ (0)