Хитой 2027 йилга қадар қуролланишга 700 та ядро каллагини етказиб беришни, 2030 йилга бориб эса уларнинг сонини мингга етказишни режалаштирмоқда. Бу ҳақда Пентагоннинг Хитой қуролли кучларини ривожлантириш борасидаги йиллик ҳисоботида эълон қилинган, деб хабар беради «Коммерсантъ».
Бундан олдинги ҳисоботда АҚШ Хитойда 200 та ядро каллаги борлиги ва 2030 йилга бориб уларни икки баробар оширишни режалаштираётганини тахмин қилганди.
Frans-Press’нинг ҳисоботига таяниб ёзишича, Хитой стратегик авиация қитъалараро баллистик ракеталар ва сувости атом ракета ташувчиларни ўз ичига олган «ядровий триада»ни шакллантирмоқда. АҚШ Мудофаа вазирлигининг ҳисоблашича, Хитой рақибларига ядровий қурол ёрдамида ҳужум қилиш ниятида эмас, аммо ҳужумларнинг олдини олишни хоҳлаяпти.
АҚШ Қуролли Кучлари штаб бошлиқлари қўмитаси раиси генерал Марк Миллининг маълум қилишича, дунё ҳамжамияти юқори даражадаги стратегик беқарорлик даврига ўтмоқда. Унинг сўзларига кўра, халқаро муносабатлар тизимида эндиликда учта куч маркази шаклланяпти — Россия, Хитой ва АҚШ.
Financial Times маълумотларига кўра, АҚШнинг иттифоқдошлари Жо Байден администрацияси тайёрланаётган «Ядровий сиёсат обзори»га ядровий қуролдан биринчи бўлиб фойдаланмаслик принципини киритиши мумкинлигидан хавотирда. АҚШ шерикларининг фикрича, бу Россия ва Хитойга нотўғри сигнал бўлиб, уларда «жазосизлик иллюзиясини» яратиши мумин.
Аввалроқ Хитой АҚШни Тайван билан расмий алоқаларини зудлик билан тўхтатишга, шунингдек, совуқ уруш менталитетидан воз кечиб, ХХРга хаёлий рақиб сифатида муносабатда бўлишни бас қилишга чақирганди.
Изоҳ (0)