Германия ва Греция коронавирус тарқалишига қарши кураш доирасида эмланмаган фуқаролар учун карантин чекловларини кучайтиришга қарор қилди, деб хабар беради «РБК».
Германия канцлери вазифасини бажарувчи Ангела Меркель Германия христиан-демократик иттифоқи йиғилишида мамлакатда эмланмаган фуқаролар учун «қаттиқ чекловлар» жорий этилишини маълум қилган. У мазкур чекловлар нимадан иборатлигига ойдинлик киритмаган, бироқ шу билан бирга, эмланмаганлар иш жойида ҳар куни тест топшириши мумкинлигини айтган.
Меркель касаллар сонининг ортиб бораётгани уни қаттиқ хавотирга солаётганини билдирган. N-ТV телеканалининг маълум қилишича, Германияда коронавирус билан касалланган беморларни даволовчи интенсив терапия бўлинмалари тўлиб бормоқда, вакцинация жараёни эса ўзгаришсиз қоляпти. Германияда шу кунга қадар 4,6 миллион кишида коронавирус аниқланган, сўнгги бир суткада уларнинг сони 10,8 минг кишига ошган. Пандемия бошланганидан буён 95,8 минг киши COVID-19 асоратлари оқибатида вафот этган (ўтган бир суткада 81 киши).
Греция ҳам эмланмаган фуқароларга нисбатан қўшимча чекловларни жорий этишга қарор қилди. 6 ноябрдан бошлаб улар банклар, кўнгилочар муассасалар, сартарошхоналар, ижтимоий ташкилотларга ПЗР-тест натижасини тақдим этган ҳолда ташриф буюра олади. Озиқ-овқат дўконлари, дорихоналар ва диний объектларга эса олдингидек бемалол кириб-чиқиш мумкин.
Бундан ташқари, хусусий ва давлат секторларининг эмланмаган барча фуқароларига ҳафтасига икки марта ўз ҳисобидан коронавирусга тест топшириш мажбурий этиб белгиланади.
Греция соғлиқни сақлаш вазири Танос Плевриснинг маълум қилишича, коронавирусга қарши назоратни кучайтириш доирасида, шунингдек, бу каби чеклов қонунларини бузганлик учун жарималар оширилади.
Аввалроқ дунёда коронавирус қурбонларининг сони 5 миллиондан ошгани, Хитой АҚШ разведкасининг COVID-19 келиб чиқиши ҳақидаги хулосаларини ёлғон ва илмий жиҳатдан асоссиз деб айтгани тўғрисида хабар берилганди.
Изоҳ (0)