Surtma, choy va smuzi: Gripp bilan kasallanganda asqatadigan 5 retsept

Albatta, ushbu tabiiy darmon vositalari virus bilan kurasha olmaydi, ammo ular nafas yo‘li infeksiyasining alomatlarini yengillashtirishga yordam beradi.

Vitaminli smuzi

Ushbu ichimlik immunitet tizimini qo‘llab-quvvatlovchi va organizmning infeksiyaga chidamliligini oshirish uchun mo‘ljallangan. Bundan tashqari, smuzi vaznga umuman ta’sir qilmaydi.

Kerakli mahsulotlar:

• apelsin — 1 dona;
• sabzi — 1 dona;
• lavlagi — 1 dona;
• olma — 1 dona;
• ismaloq — 50 gramm;
• qorag‘at — 200 gramm;
• suv — 150 ml.

Tayyorlash jarayoni:

Meva va sabzavotlar tozalanadi. Urug‘lari olinib, mayda bo‘laklarga bo‘linadi. Barcha mahsulotlar bir xil massa bo‘lgunga qadar blenderda aralashtiriladi. Agar kerak bo‘lsa, biroz qaynatilgan suv qo‘shiladi.

Malinali choy

Malina an’anaviy tibbiyotda foydalaniladigan eng mashhur isitmani tushiruvchi vosita hisoblanadi. Rezavor tarkibida foydali bo‘lgan mikro va makroelementlar mavjud. Shuning uchun O‘RVI bilan kasallanganda malinali choy juda foydali hisoblanadi. U har qanday kasallik vaqtida ichilsa, dam olishga yordam beradi.

Kerakli mahsulotlar:

• qora choy — 3—4 osh qoshiq;
• quritilgan yalpiz — 1 choy qoshiq;
•  limon po‘sti — 1 choy qoshiq;
• malina — 2—3 osh qoshiq;
• asal.

Tayyorlanish jarayoni:

Choynakka yalpiz, limon po‘sti va choy solinadi. Ustidan 2—2,5 stakan qaynoq suv quyiladi. 10—15 daqiqa qaynatiladi. Idish ichidan choy barglari olinib, malina solinadi va 7—10 daqiqa qaynatiladi. Tayyor bo‘lgach, choy stakanlarga quyiladi va ta’bga ko‘ra asal qo‘shiladi.

Shifobaxsh surtma

Ushbu surtma burun oqishi va yo‘talni davolashda yordam beradi. Shuningdek, tabiiy mahsulotlardan tayyorlanadi va mutlaqo zararsizdir. Lekin allergiyaga moyil kishilar ehtiyot bo‘lishi lozim. Shuning uchun mahsulotdan foydalanishdan avval mutaxassis bilan maslahatlashgan ma’qul.

Kerakli mahsulotlar:

• asal mumi — bir bo‘lak;
• chakanda moyi — 50 ml;
• zaytun moyi — 15 ml.

Tayyorlanish jarayoni:

Chakanda moyi suv bug‘ida qizdiriladi. Shuningdek, uni boshqa yog‘lar bilan almashtirish ham mumkin. So‘ngra unga zaytun moyi qo‘shiladi. Yog‘lar qaynamasligi zarur. Ustidan asal mumi qo‘shiladi. Mahsulot to‘liq erigandan so‘ng yaxshilab aralashtirilib, shisha idishga quyiladi. Tayyor bo‘lgan malhamni muzlatkichda 10 oygacha saqlash mumkin. Uni yo‘talda oyoqqa, ko‘krak sohasiga, yelka qismiga va burun atrofiga surish mumkin.

Sitrusli ichimlik

Ma’lumki, virus va bakteriyalar kislotali muhitda yo‘qoladi. Bundan tashqari, C vitamini miqdori qanchalik yuqori bo‘lsa, gripp simptomlari tezroq bartaraf etiladi. Bu isbotlangan haqiqat. Shuning uchun C vitaminining koni — sitruslarga murojaat qilish kerak.

Kerakli mahsulotlar:

• qora choy — 3—4 osh qoshiq;
• qalampirmunchoq — 5 dona;
• limon — 2 bo‘lak;
• apelsin — 2 bo‘lak;
• laym — 2 bo‘lak.

Tayyorlanish jarayoni:

Idishga choy va qalampirmunchoq solinadi, ustidan 1,5—2 stakan suv quyib qaynatiladi. Choy barglari olinib, mevalar qo‘shiladi va past olovda qaynatiladi. Choy stakanlarga quyiladi, agar quyuq bo‘lsa, suv yordamida suyultirish mumkin.

Zanjabilli choy

O‘ziga xos ta’mga ega choy tomoq og‘rishida juda foydali. Bundan tashqari, burun bitishi hamda shamollashda terlashga yordam beradi.

Kerakli mashulotlar:

• ko‘k choy — 3—4 osh qoshiq;
• dolchin — 0,5 choy qoshiq;
• zanjabil — 10-15 gramm;
• limon — 2 bo‘lak;
• yong‘oq, qizilmiya, asal.

Tayyorlanish jarayoni:

Choy va ziravorlar aralashtirilib, 1,5—2 stakan suvda qaynatiladi. So‘ngra zanjabil va limon qo‘shiladi va yana biroz qaynatiladi. Choy barglari olinib, qaynoq suv bilan suyultiradi. Ta’bga ko‘ra asal qo‘shiladi.