Сайлов ўтди, лекин сайловолди жараён кўнгилни ғаш қилувчи (камида битта) воқеа билан ёдда қоладиган бўлди: «Ўзбекнефтгаз» компанияси бошқаруви раиси ўринбосари Мухтор Темиров дастлаб 13-Қашқадарё сайлов округи матбуот маркази раҳбари Жаҳонгир Тўйчиевни куракда турмайдиган сўзлар билан ҳақоратлади, икки мансабдор ўртасидаги низони ёритишга уринган «Дарё» мухбири Отабек Қўлдошевга нисбатан эса куч ишлатди.
20 октябрь куни 13-Қашқадарё сайлов округи ташаббуси билан вилоятда фаолият юритувчи ва Президент сайловини ёритиш учун акредитациядан ўтган журналистлар учун пресс-тур ташкил этилган. Пресс-тур округ бош қароргоҳидан бошланиб, сўнг туманларда давом этиши лозим эди. Иштирокчиларни ҳудудларга олиб бориш учун «Ўзбекнефтгаз» томонидан автобус ажратилган. Бироқ кутилмаганда компания раиси ўринбосари Мухтор Темиров «автобусни олиб қўйган».
Вазиятга аниқлик киритиш учун «Ўзбекнефтгаз» мансабдорининг олдига бориб қайтган Жаҳонгир Тўйчиев (у айни вақтда вилоят телерадиокомпанияси директори ҳам ҳисобланади) ҳамкасбларига Темировдан шикоят қилган. «Мен бу автобус пресс-тур учун берилганини айтсам, у бунга жавобан мени тилга олиб бўлмас сўзлар билан ҳақоратлади», — деган Тўйчиев. Шундан сўнг Тўйчиев ҳам, бошқа журналистлар ҳам «Ўзбекнефтгаз» мансабдори нима учун ўзини бундай тутаётганига аниқлик киритмоқчи бўлган.
«Ўзбекнефтгаз» бошқаруви раиси ўринбосари Мухтор Темиров унинг олдига бир гуруҳ камера кўтарган журналистлар билан қайтиб келган Жаҳонгир Тўйчиевга журналистлар олдида изоҳ бермаслигини, у билан ўз хонасида холи гаплашиб олиши мумкинлигини билдирган. Шундан сўнг вилоят сайлов округи матбуот маркази раҳбари маълум вақт ёпиқ эшиклар ортида «Ўзбекнефтгаз» вакили билан гаплашган, бошқа журналистлар у ерга киритилмаган.
Бироздан сўнг ичкарига киришга муваффақ бўлган ва воқеани тасвирга ола бошлаган «Дарё» мухбири Отабек Қўлдошев «Ўзбекнефтгаз» бошқаруви раиси ўринбосари Мухтор Темиров қаршилиги ва қўпол муносабатига дуч келган. Мухбирнинг сўзларига кўра, мансабдор уни бўғиб, «таъзирини бериб қўйиши»ни айтган. Шунингдек, Темиров ва эшик олдидаги «посбон» мухбирнинг камерасини тортиб олишга уринган. Аммо атрофдаги журналистларнинг «Дарё» мухбирига берган кўмаги туфайли улар ўз ниятига етолмаган.
Маълумот ўрнида: Бу можаро орасида округ қароргоҳига «Ўзбекнефтгаз» мансабдори олиб қўйган автобус ўрнига журналистларни олиб кетиш учун ЎзЛиДеП рамзи туширилган автобус етиб келган. Аммо ОАВ вакиллари сайловолди ташвиқотни инобатга олиб, ЎзЛиДеП рамзи туширилган автобусда кетишдан бош тортган. Мутасаддилар автобусдаги партия логотипини олиб ташлашга киришган вақти, журналистлар бунга ҳам қарши чиқиб, туманларга бошқа микроавтобусларда чиқиб кетган.
Шундан сўнг «Дарё» мухбири билан на Мухтор Темиров, на «Ўзбекнефтгаз»нинг бошқа бир вакили боғланган. «Дарё» интернет-нашри “Ўзбекнефтгаз” компанияси томонидан мазкур вазият юзасидан изоҳ берилишини кутмоқда.
«Дарё» интернет-нашри сайловолди жараённи ёритишга жалб этилган журналистларни ҳақорат қилган ва улардан бирига қўл кўтарган «Ўзбекнефтгаз» раҳбари ўринбосари Мухтор Темировнинг биргина узр билан ўз ишини ҳеч нарса бўлмагандек давом эттираверишига тоқат қилиб бўлмайди, деб ҳисоблайди. Компания ва Энергетика вазирлиги Мухтор Темиров каби муомала маданияти қониқарсиз бўлган ходимлар ўртасида нафақат журналистлар, балки барча фуқаролар билан мулоқот олиб бориш одоби юзасидан тушунтириш ишларини олиб бориши ва уларга нисбатан қатъий таъсир чораларини кўриши мақсадга мувофиқдир.
Маълумот учун: «Дарё» мухбири Отабек Қўлдошевнинг фаолиятига 2021 йил апрелида Қарши шаҳар ИИО ФМБ бошлиғи ўринбосари Азамат Шаймарданов қўполлик қилган эди. Ушбу ҳолат жамоатчиликнинг кескин норозилигига сабаб бўлган, якунда Шаймардановга нисбатан «қаттиқ ҳайфсан» интизомий жазоси қўлланилган эди. Ўшанда прокуратура органлари тайинланган ушбу жазонинг қанчалик ҳаққоний ва қонунийлигига баҳо берилишини билдирган, бироқ баҳолаш натижалари «Дарё»нинг бир неча сўровларига қарамай, ҳамон ошкор қилинмаган.
Изоҳ (0)