Ташқи меҳнат миграцияси агентлигининг Жанубий Кореядаги ваколатхонаси раҳбари Инсон ресурсларини ривожлантириш хизматининг вице-президенти билан учрашув ўтказди. Бу ҳақда агентлик матбуот хизмати хабар берди.
Маълум қилинишича, учрашувда меҳнат миграцияси жараёнларини босқичма-босқич тиклаш масаласи кўтарилди. Даставвал Ўзбекистонда коронавирус билан кунлик зарарланиш ҳолатлари камайганлиги ҳамда Ўзбекистондаги мавжуд вакцина турлари ҳақида батафсил маълумот берилди.
Вице-президентнинг сўзларига кўра, ҳозирда Ўзбекистондан меҳнат мигрантлари кириб келишини қисман тиклаш режалаштирилмоқда. Бунда, биринчи навбатда тўлиқ эмлашдан ўтган 4 йилу 10 ой Жанубий Кореяда бир корхонада ишлаб қайтган фуқароларни киритиш кўзда тутилган.
Ўз навбатида меҳнат мигрантларининг Жанубий Кореяга мунтазам кириб келишини таъминлашда карантин қоидаларига қатъий риоя қилиш муҳим ўрин эгаллаши таъкидланди.
Шунингдек, учрашувда танловлар базасида муддат қўшиб берилган фуқароларга иккинчи бор муддат қўшиб бериш бўйича ҳам музокаралар олиб борилди ва мазкур масала Инсон ресурсларини ривожлантириш хизмати томонидан яқин кунларда кўриб чиқилиши қайд этилди.
Эслатиб ўтамиз, 2020 йилдаги эпидемиологик вазиятдан келиб чиқиб меҳнат таътили олиб келган ва шартнома лойиҳасини олган фуқароларнинг Жанубий Кореяга меҳнат фаолиятини амалга ошириш учун кетиш имконияти чекланган эди. 2021 йилнинг февраль ойи бошларида Жанубий Корея Ўзбекистонни коронавирус бўйича хавфли давлатлар рўйхатидан чиқарди.
Фуқароларни Корея Республикасига ишга жўнатиш (E-9 ишчи виза) ҳуқуқига эга ягона ташкилот Ташқи меҳнат миграцияси агентлиги ҳисобланади, хусусий бандлик агентликларининг бунга ваколати йўқ.
Изоҳ (0)