АҚШ президенти Жо Байден Италия пойтахти Римдаги G20 («катта йигирматалик давлатлар») саммитида Россия президенти Владимир Путин ва Хитой раҳбари Си Цзиньпин иштирок этмаганидан ҳафсаласи пир бўлганини маълум қилди. Бу ҳақда у саммит якунида бўлиб ўтган матбуот анжуманида айтиб ўтди.
«Иқлим ўзгариши бўйича мажбуриятларни муҳокама қилишда Россиянинг, нафақат Россия, балки Хитойнинг ҳам иштирок этмагани ҳафсалани пир қилади», — деди у.
Шу тариқа Байден журналистларга «баъзи нодавлат ташкилотлар»нинг G20 иқлим келишувлари ишончни уйғотмаслиги ҳақидаги баёнотларига фикр билдирди. АҚШ президенти, шунингдек, иқлим масалаларида «Хитой, Россия ва Саудия Арабистони нима қилмаётгани»га эътибор қаратишга чақирди.
Италия пойтахтида G20 нинг йиллик саммити 30—31 октябрь кунлари бўлиб ўтди. G20 йиғилиши иштирокчилари Римда икки кун давом этган муҳокамалар якунида глобал исишни Цельсий бўйича 1,5 даражага чеклаш бўйича келишиб олди, бироқ бу мақсадга эришиш учун бутун дунё ҳамжамиятидан муҳим ва самарали чоралар талаб этилишини тан олди.
Россия ва Хитой раҳбарлари бу йилги саммитда қатнашмади. Улар конференция иштирокчилари билан видеоалоқа орқали мулоқот қилди. Хусусан, Путин йиғилишда сўзга чиқиб, бошқа давлатлар қатори Россия ҳам глобал исиш оқибатларини бошидан кечираётганини айтди. «Биз чўлланиш ва тупроқ эрозиясига дуч келяпмиз. Айниқса, ҳудудимизнинг катта қисмини эгаллаган абадий музликлар эриб бораётганидан хавотирдамиз», — деди Россия раҳбари. Унинг таъкидлашича, Россияда ўртача йиллик ҳарорат глобал ҳароратдан тезроқ кўтарилиб бормоқда ва ўн йил ичида деярли ярим даражага ошган, Арктикада эса ўзгаришлар бундан ҳам тезроқ содир бўлмоқда.
Саммитдан сўнг Бирлашган Миллатлар Ташкилоти бош котиби Антониу Гутерриш G20 етакчиларининг учрашуви унинг умидларини оқламаганини билдирди. «Мен G20 нинг глобал ечимлар бўйича мажбуриятини олқишлаган бўлсам-да, Римдан амалга ошмаган умидлар билан кетяпман, лекин ҳарқалай улар сўнмади», — деди у.
Изоҳ (0)