Тирамису ширинлигининг муаллифи сифатида машҳур бўлган италиялик Адо Кампеол 2021 йилнинг 31 октябрь куни 92 ёшида вафот этди. Бу ҳақда «Korrespondent.net» хабар берди.
Маълум қилинишича, Кампеолнинг Тревизо шаҳрида Le Bescherie номли ресторани бўлган. Венеция губернатори Адо Кампеолнинг ўлими муносабати билан ҳамдардлик билдирган. «Адо Кампеол билан таом ва вино олами яна бир юлдузини йўқотмоқда», — деган у.
Губернаторнинг айтишича, Кампеолнинг юзидан ҳеч қачон табассум аримаган, унинг ресторани эса меҳмондўстлиги ва юқори сифати билан ажралиб турган.
Маълум бўлишича, Кампеолга машҳур ширинликни тайёрлашда 1960 йилларнинг охирида рафиқаси Альба Ди Пилло ва ошпаз Роберто Лингуанотто ёрдам берган. Ошпаз ванилинли музқаймоқ тайёрлаётган вақт тухум ва шакарли аралашмага бироз маскарпоне (қаймоқли пишлоқ) тушиб кетган. Аралашманинг таъми ёққанидан кейин ошпаз ресторан эгасининг рафиқасига хабар берган. Жуфтлик эса кейинроқ қаҳва сингдирилган бисквитга какао сепиб, ширинликни янада мукаммаллаштирган. Тирамису ҳақида илк бор гастроном Жузеппе Маффиоли ёзган. Кампеоллар оиласи рецептни патентлаштирмагани унинг турлича тайёрланадиган вариантлари пайдо бўлишига ҳисса қўшган.
Изоҳ (0)