Хитой ташқи ишлар вазири Ван И АҚШ Давлат котиби Энтони Блинкен билан учрашувда Вашингтоннинг Тайванга нисбатан сиёсати Хитой—Америка муносабатларининг ёмонлашуви ва Тайван бўғози минтақасидаги вазиятнинг кескинлашуви билан тўла эканидан огоҳлантирди.
Xinhua агентлиги маълумотларига кўра, Ван И Тайван масаласи Хитой ва АҚШ муносабатларидаги энг нозик масала эканини таъкидлаган ва «агар унга нотўғри ёндашилса, бу Хитой—АҚШ муносабатларига путур етказиб, глобал зарар келтиришини» айтган.
Хитой дипломатининг таъкидлашича, сўнгги пайтларда Тайван бўғози ҳудудидаги вазият Тайван расмийларининг ягона Хитой мавжудлиги тамойилини бузишга уринишлари туфайли ёмонлашган, бунга, шунингдек, Америка томонининг «Тайван мустақиллик» кучлари билан келишуви ва уларга кўмаги ҳам ёрдам берган.
«Тайван мустақиллигини эълон қилишга қаратилган тенденциянинг ривожланишини тўхтатиш Тайван бўғозида тинчлик сақлашни англатади», — деди Ван И.
«Биз Америка томонига Тайван мустақиллигига қаратилган сиёсат қанчалик хавфли эканини тушунишни маслаҳат берамиз. Биз Қўшма Штатлардан ягона Хитой сиёсатини сохта эмас, чинакамига юритишини, АҚШ Хитой олдидаги мажбуриятларини бажаришини ва сўзи бошқа амали бошқа бўлмаслигини талаб қиламиз», — деди Ван И.
Ван И, шунингдек, АҚШ Хитойнинг қонуний ҳуқуқ ва манфаатларига путур етказаётган турли масалалар юзасидан Хитойнинг жиддий хавотирини билдирди ҳамда Америка томонидан «оҳангини ўзгартиришни ва Хитой-Америка муносабатларини соғлом ривожланиш йўлига қайтаришга кўмаклашишни» сўради.
Шунингдек, томонлар иқлим ўзгариши, энергия таъминоти, Эрон ядро дастури, Корея яримороли, Мьянма ва Афғонистондаги вазият каби муҳим масалалар юзасидан фикр алмашиб, турли глобал муаммоларни ҳал этиш бўйича мулоқотни давом эттиришга тайёр эканини билдирди.
Учрашув ҳақида хабар берган АҚШ Давлат департаменти қайд этишича, «Блинкен АҚШ ва ХХР ўртасидаги рақобатга масъулият билан ёндашиш учун очиқ алоқа линияларини сақлаш муҳимлигини таъкидлаган».
«У икки давлат манфаатлари кесишадиган ва биз ҳамкорликда ишлашимиз мумкин бўлган соҳаларга – КХДР, Мьянма, Эрон, Афғонистон ва иқлим инқирозига эътибор қаратди», — дейилади АҚШ Давлат департаментининг баёнотда.
Учрашув Римда Г20 тадбирлари доирасида бўлиб ўтди.
Аввалроқ Хитой АҚШни Тайван билан расмий алоқаларини зудлик билан тўхтатишга шунингдек, совуқ уруш менталитетидан воз кечиб, ХХРга хаёлий рақиб сифатида муносабатда бўлишни бас қилишга чақирганди.
Изоҳ (0)