Буюк Британия қироличаси Елизавета II тиббиёт ходимларининг тавсиясига биноан камида икки ҳафта енгиллаштирилган режимда ишлайди. Бу ҳақда Букингем саройи баёнотига таяниб, «Интерфакс» хабар берди.
«Шифокорлар бу вақт давомида ҳазрати олияларига фақат енгил юмушларни, хусусан, айрим қабулларни онлайн форматда ўтказишни, бироқ ҳеч қандай расмий ташрифларни амалга оширмасликни тавсия қилди», — дейилади унда.
Шу ҳафтада Буюк Британия қироличаси аввалроқ режалаштирилганидек Глазгода ўтказиладиган иқлим бўйича саммитга бормаслиги маълум бўлган.
Эслатиб ўтамиз, октябрь бошларида 95 ёшли қиролича Елизавета II бир кеча шифохонада қолган. У шифохонага тушиб қолишидан олдин Шимолий Ирландияга ташрифини бекор қилган. Букингем саройи вакили ўшанда «айрим дастлабки текширувлар ўтказилгани»ни маълум қилганди.
Аввалроқ Қиролича Елизавета II га шифокорлар спиртли ичимликлардан воз кечишни тавсия қилгани тўғрисида хабар берилганди. Қироллик саройидаги хабардор манбаларнинг маълум қилишича, қиролича бу тавсияни жиддий қабул қилиб, спиртли ичимликлардан бутунлай воз кечишга қарор қилган, бироқ илгари ҳам уни кўп ичади деб бўлмасди. Энди у ҳатто севимли «Мартини» коктейлларидан воз кечган ва фақат Malvern сувини ичмоқда.
Изоҳ (0)