Андижон шаҳрида рақамсиз ва ҳеч қандай ҳужжатсиз ҳаракатланиб кетаётган Nexia-3 автомобили ҳайдовчиси йўл-патруль хизмати инспекторига масалани ҳал қилиб беришни сўраб, 300 доллар пора бераётганда қўлга олинди. Бу ҳақда «Дарё» мухбири хабар бермоқда.
Маълум бўлишича, вилоят Йўл ҳаракати хавфсизлиги бошқармаси 4-сафарбарлик гуруҳи инспектори томонидан Андижон шаҳридаги Бобур шоҳкўчасида давлат рақами белгисисиз ҳаракатланиб келаётган Nexia-3 автомашинаси текшириш учун тўхтатилган. Текширув давомида ҳайдовчига ва автомашинага тегишли ҳужжатлар мавжуд эмаслиги, давлат рақам белгиси ўзбошимчалик билан ечиб олиниб, юкхонада сақланаётгани ҳамда автомашина ён ойналари рухсатномасиз қорайтирилгани аниқланиб, белгиланган тартибда маъмурий баённома расмийлаштирилган. Автомашина эса вақтинчалик сақлаш учун жарима майдонига жойлаштирилган.
Фуқаро йўл-патруль хизмати инспекторлари томонидан пора бериш ва пора олиш жиноят экани тўғрисида бир неча марта огоҳлантирилишига қарамай, уларга 300 доллар миқдорида пул таклиф қилган. ЙПХ инспектори ҳолат юзасидан вилоят ИИБ бошлиғи номига билдирги билан мурожаат қилган. Ходимнинг билдиргисига асосан ҳуқуқни муҳофаза қилувчи орган ходимлари ҳамкорлигида ўтказилган тезкор тадбир давомида ҳайдовчи ЙПХ инспекторига 300 долларни пора тариқасида берган вақтда ушланган. Пул холислар иштирокида далилий ашё тариқасида расмийлаштириб олинган.
Ҳолат юзасидан фуқарога нисбатан Жиноят кодексининг 211-моддаси 1-қисми (пора бериш) билан жиноят иши қўзғатилган. Ҳозирда тергов-суриштирув ишлари давом этмоқда.
Мавзуга доир:
- Навоийда олтин рудасини ноқонуний қазиб олгани учун қўлга олинган шахс ИИБ ходимига 300 доллар пора беришга уринди
- Бухорода профилактика инспекторига 100 доллар пора бермоқчи бўлган шахс қўлга олинди
- Самарқандда қалбаки ПЗР-тест таҳлилини сотиб қўлга тушган шахснинг укаси бу ишни ёпиш эвазига ИИБ ходимига пора бераётганда ушланди
Изоҳ (0)