Samarqandda qalbaki PZR-test tahlilini sotib qo‘lga tushgan shaxsning ukasi bu ishni yopish evaziga IIB xodimiga pora berayotganda ushlandi
Samarqand viloyatida koronavirus mavjud emasligi haqida qalbaki test tahlilini sotayotgan shaxs ushlandi, bu ishni yopib yuborish evaziga pul taklif qilgan ukasiga jinoiy ish ochildi. Bu haqda viloyat IIB matbuot xizmati xabar qildi.
Qayd etilishicha, 2021-yil 30-iyul kuni Samarqand viloyati IIB Xavfsiz turizmni ta’minlash boshqarmasi tezkor xodimlari tomonidan Toyloq tumani markazida o‘tkazilgan tezkor tadbir davomida, 1990-yilda tug‘ilgan, Samarqand shahar “Imom Vose” mahallasida yashovchi X.D. chet davlatga ketishi va aviachipta olishi uchun kerak bo‘ladigan COVID-19 virusi mavjud emasligi to‘g‘risidagi test tahlilini soxtalashtirgan holda 180 000 so‘mga sotgan vaqtida daliliy ashyolar bilan ushlangan.
Holat yuzasidan tergovga qadar tekshirish harakatlari olib borish jarayonida fuqaro X.D. ning ukasi holatni rasmiylashtirmaslik va ishni ijobiy tomonga hal qilib berish evaziga tezkor xodimga 5 ming AQSh dollari miqdoridagi pullarni pora sifatida taklif qilgan.
Xodim IIO xodimiga pul taklif qilish, Jinoyat kodeksining 211-moddasi (pora berish) bilan jinoyat ishi qo‘zg‘atilib, javobgarlikka tortilishiga sabab bo‘lishi to‘g‘risida ogohlantirishiga qaramay, fuqaro keyin kelib uchrashishini aytib chiqib ketgan. Xodim holat yuzasidan boshqarma boshlig‘iga bildirgi bilan murojaat qilgan.
Bildirgiga asosan 2021-yil 31-iyul kuni IIV O‘z xavfsizligi boshqarmasi Samarqand viloyati bo‘yicha bo‘limi hamda Samarqand shahar prokuraturasi xodimlari tomonidan tezkor tadbir o‘tkazilib, fuqaro I.X. tezkor xodimga 5 ming AQSh dollarini pora tariqasida bergan vaqtida ashyoviy dalillar bilan ushlangan.
Mazkur holat bo‘yicha Samarqand shahar prokuraturasi tomonidan Jinoyat kodeksining 211-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval Toshkent viloyatida qalbaki PZR-test tahlilini tayyorlab sotayotgan shaxs qo‘lga olingani, Toshkentda o‘zini harbiy xizmatchi deya tanishtirib, fuqarolarni 80 mln so‘mga chuv tushirgan shaxs ushlangani hamda Farg‘onada qalbaki 50 va 100 dollarlik kupyuralarni muomalaga kiritmoqchi bo‘lgan shaxs ushlangani haqida xabar berilgandi.
