АҚШ миллий разведкаси директорининг офиси (ODNI) SARS-CoV-2 коронавируснинг келиб чиқиши борасидаги разведка ҳамжамиятларининг махфий хулосаларини эълон қилди, деб хабар беради «РБК».
Мамлакатнинг аксарият разведка идоралари вирус биологик қурол сифатида ишлаб чиқилмаган ва «ген муҳандислиги ёрдамида яратилмаган бўлиши мумкин» деб ҳисоблайди. Аммо иккита идора бу каби баҳолаш учун «етарлича маълумотлар бўлмаган» дея таъкидлаган.
Разведка ҳамжамиятларининг фикрича, Хитой ҳукумати SARS-CoV-2 нинг мавжудлиги ҳақида Уханда коронавирус инфекцияси юзага келмагунига қадар бехабар бўлган.
Ҳисобот муаллифлари коронавируснинг пайдо бўлиши борасида ягона хулосага кела олмаган. Асосан иккита версия инобатга олинмоқда: вируснинг ҳайвондан инсонга табиий йўл орқали юқиши ёки «лаборатория билан боғлиқ можаро».
Таъкидланишича, коронавируснинг пайдо бўлиши борасида якуний хулосага келиш учун Хитойнинг ҳамкорлиги зарур. Аммо ҳужжатда қайд этилишича, Пекин «глобал терговга қаршилик кўрсатишни давом этмоқда», маълумотлар алмашинувини қўллаб-қувватламаяпти ва «бошқа мамлакатлар, жумладан, АҚШни айбламоқда».
Август охирида эълон қилинган АҚШ Миллий разведка бошқармаси ҳисоботида ҳам шунга ўхшаш хулосалар баён этилган эди. Унда айтилишича, коронавирус Хитой томонидан биологик қурол сифатида яратилмаган ва хитойлик амалдорлар SARS-CoV-2 нинг илк ўчоқлари пайдо бўлмагунга қадар вирус ҳақида маълумотга эга бўлмаган.
Хитой бу ҳисоботни илмий жиҳатдан ноаниқ деб топган. Унга кўра, АҚШ разведкаси ўз хулосаларини ХХРнинг «айбдорлиги ҳақидаги тахминга» асослаган. Пекин Вашингтонни «коронавируснинг келиб чиқишини сиёсийлаштиришни тўхтатишга» чақирди. Хитойлик олимлар SARS-CoV-2 қандай пайдо бўлгани тўғрисида ўз тадқиқотларини олиб борди ва унинг сунъий яратилгани эҳтимолдан йироқ деган хулосага келди.
Изоҳ (0)