NASA илк бор Юпитердаги Улкан Қизил доғнинг чуқурлигини ўлчашга муваффақ бўлди

NASA космик зонди — Juno Юпитернинг булутли қатлами остига назар ташлаб, Ердан каттароқ бўлган машҳур Улкан Қизил доғнинг чуқурлигини ўлчашга муваффақ бўлди. Бу ҳақда NASA реактив ҳаракат лабораторияси хабар берди.

Juno 2016 йилдан бери Юпитер атрофида айланади, космик аппаратнинг микротўлқинли радиометри олимларга булутлар остини «кўздан кечириш» ва сайёра атмосферасидаги гирдобларни ўрганиш имконини беради.

Янги натижалар шуни кўрсатадики, Улкан Қизил доғ сув конденсацияланадиган ва булутлар пайдо бўладиган жойлардан қуйироқни қамраб олади, қуёш нурлари у ердаги атмосферани иситмайди.

«Улкан Қизил доғнинг баландлиги ва ўлчами бўрон ичидаги атмосфера массаси концентрациясини Юпитернинг тортишиш майдонини ўрганувчи асбоблар ёрдамида аниқлаш мумкинлигини англатади», — дейилади хабарда.

Олимлар 650 миллион километр узоқликдаги NASA чуқур фазо тармоғини кузатувчи антенна ёрдамида Juno тезлигининг ўзгаришини сониясига 0,01 миллиметр аниқликкача ўлчашга муваффақ бўлди. Улар Улкан Қизил доғ чуқурлиги булутларнинг юқори чегарасидан тахминан 300 миля (500 километр) пастда жойлашган деган хулосага келди.

Юпитер циклонлар ва антициклонлардан ташқари, сайёрани ўраб турган оқ ва қизғиш булутли чизиқлари билан машҳур. Шарқ ва ғарбдан эсаётган кучли шамоллар чуқурлиги 3,2 минг километрга етадиган бу чизиқларни ажратиб туради.

Juno микротўлқинли радиометри томонидан тўпланган маълумотларга кўра, Юпитер атмосферасидаги аммиак гази «кузатилган реактив оқимлар билан ажойиб мувофиқликда» ҳаракатланмоқда.

Бундан ташқари, Юпитернинг иккала қутбидаги улкан циклон бўронлари — шимолда саккизта ва жанубда бешта — бир жойда туриши жуда барқарор экани маълум бўлди.

NASAнинг реактив ҳаракат лабораторияси — NASA томонидан молиялаштириладиган ва Калифорния Технология институти томонидан бошқариладиган тадқиқот лабораторияси.