Саудия Арабистони ҳукумати Ливан элчисига мамлакатни тарк этиши учун 48 соат муддат берди. Бу ҳақда Saudi Gazette’га таяниб, «Korrespondent.net» хабар берди.
Аввалроқ мамлакат ҳукумати Ливандаги элчисини консультация учун чақириб олганди.
Дипломатик можарога Ливан ахборот вазири Георг Кордахининг август ойида Al-Jazeera телеканалига берган интервьюсида Ямандаги Саудия Арабистони бошчилигидаги коалиция ҳаракатларини босқинчилик деб атагани сабаб бўлган.
МТВ каналининг маълум қилишича, Ливан билан дипломатик муносабатларни Форс кўрфази араб давлатларининг ҳамкорлик кенгашига аъзо барча давлатлар (Саудия Арабистонидан ташқари, Қатар, Кувайт, БАА, Баҳрайн ва Уммон) узишга тайёр.
Ливан бош вазири Нажиб Микати Саудия Арабистонининг Байрутдаги элчисини чақириб олиш борасидаги қароридан афсусда эканини билдирган. У Байрут подшоҳлик томонидан ушбу позицияни қайта кўриб чиқишига умид қилишини билдирган.
«Биз Саудия Арабистонининг қароридан чуқур афсусдамиз ва подшоҳлик раҳбарияти донолик билан уни қайта кўриб чиқишига умид қиламиз. Биз ўз томонимиздан вазиятни тўғрилаш учун барча ҳаракат ва тиришқоқлигимизни сарфлашни давом эттирамиз», — дейди у.
«Коммерсантъ»нинг ёзишича, Баҳрайн ҳам Ливан элчисидан мамлакатни 48 соат ичида тарк этишни талаб қилган.
Аввалроқ Ливан бош вазири Байрутдаги портлаш тергови борасида Россиядан ёрдам сўраш масаласини суд ҳал қилишини билдиргани, Байрут марказида норозилик намойишларидаги қонли отишмада олти киши ҳалок бўлгани тўғрисида хабар берилганди.
Изоҳ (0)