Финляндия газетасининг уч нафар журналисти давлат сирларини ошкор қилганликда айбланди

Финляндия прокуратураси мамлакатдаги йирик Helsingin Sanomat газетасининг уч ходимини давлат хавфсизлигига оид сирларни ошкор қилганликда айблади. Бу ҳақда Ylе телекомпаниясига таяниб, «ТАСС» хабар берди.

Ушбу модда бўйича энг ками тўрт ой, энг кўпи тўрт йилгача қамоқ жазоси белгиланиши мумкин. Учала журналист ҳам ўз айбларини инкор этмоқда.

Аввалроқ Финляндия Марказий жиноий полицияси  «Мамлакат ташқи хавфсизлигини таъминлаш учун сир сақланиши керак бўлган маълумотлар Helsingin Sanomat офисида қайта ишланган» деб гумон қилишга асос борлигини хабар қилганди. Қайд этилишича, «ушбу махфий маълумотларнинг бир қисми бўйича материаллар — режалаштирилган маълумотлар сериясининг биринчи қисми нашр этилган, қолган қисми дастлабки тергов бошлангани сабабли нашр этилмаган».

Шу билан бирга, полиция журналистларга келиб тушган маълумотлар ноқонуний йўл билан олинмаган деган хулосага келди.

Терговнинг бошланиши

2017 йил декабрь ойи ўрталарида Финляндия марказий жиноий полицияси Helsingin Sanomat гаэтасининг мамлакат ҳарбий разведкасига, жумладан, Россияга алоқадор махфий ҳужжатларни чоп этиши бўйича тергов бошлади. Хусусан, нашр Россия ҳарбийларнинг кузатуви ва Финляндия разведкасининг «Шимолий оқим» газ қувури бўйича хавотирлари ҳақида ёзган.

Финляндия қонунчилигига кўра, давлат сирларини ошкор қилганлик учун гумондорларга тўрт йилдан умрбодгача қамоқ жазоси, расмий сирни эълон қилганлик учун – миқдори суд томонидан белгиланадиган жарима ёки икки йилгача қамоқ жазоси тайинланади.

Тергов доирасида 2017 йил декабрь ойида газета журналисти Лаура Халминеннинг уйида тинтувлар ўтказилган, чунки у шов-шувли мақола муаллифларидан бири эди. Ўшанда полиция унинг шахсий ва офис телефонлари, компьютер, планшет ва бир нечта флеш-карталарини мусодара қилди. Тинтувдан олдин журналист ундаги маълумотларни йўқ қилиш ва олинган маълумотлар манбаларини ҳимоя қилиш учун компьютерининг қаттиқ дискини болға билан синдириб ташлаган.

Бироқ кейинроқ Финляндия Олий суди мамлакат полициясига журналистдан тортиб олинган электрон оммавий ахборот воситалари маълумотларини ўрганиш ва улардан тергов жараёнида фойдаланишга рухсат бермади.