Душанбеда Афғонистон Миллий қаршилик фронтининг офиси очилди. Бу ҳақда Тожикистондаги Афғонистон элчихонасига таяниб, Asia-Plus хабар берди.
Агентлик суҳбатдошининг сўзларига кўра, пойтахтнинг Исмоил Сомоний туманида жойлашган идорада айни дамда таъмирлаш ишлари олиб борилмоқда. Таъмирлашдан сўнг муассаса журналистлар учун матбуот анжумани ўтказади, унда Тожикистондаги фаолияти дастури ҳақида сўзлаб беради.
Афғонистон Миллий қаршилик фронти офисининг очилиши ҳақида аввалроқ бир қанча экспертлар хабар қилган. Хусусан, Россия сиёсатшунослар жамияти таҳлилий маркази директори, Афғонистон сиёсатини ўрганиш маркази раҳбари Андрей Серенко ўзининг Telegram каналида бу маълумотни тасдиқлаган. Бу ҳақда Тожикистонда истиқомат қилаётган Афғонистон бўйича бошқа экспертлар ҳам гапирган. Аммо Тожикистон Ташқи ишлар вазирлиги ахборот департаменти уларда бундай маълумотлар йўқлигини маълум қилди.
Айни пайтда фронт раҳбари кичик Аҳмад Масъуд қаерда экани номаълум. У анчадан бери видеомурожаат қилмаган.
«Сезон хамсинов» Telegram канали Америка Адлия вазирлиги сайтидаги тегишли ҳужжатга таяниб хабар беришича, Аҳмад Масъуд ўз вакилларини АҚШда лобби тузилмаси сифатида рўйхатдан ўтказган. Хабарга кўра, Миллий қаршилик фротининг халқаро ваколатхонаси «АҚШнинг Афғонистондаги йигирма йиллик сармоялари ҳимоячисига айланиш» ва мамлакатни «тоқатсизлик ва терроризмдан» тозалаш ниятида. Масъуднинг вакиллари Калифорнияда ўрнашиб, Конгресс ва Оқ уй билан ҳамкорлик олиб боради.
Stryk Global Diplomacy компаниясининг раҳбари Роберт Стрик сентябрь ойидаги интервьюсида афғон қаршилик кучлари америкалик лоббичилар орасидан уларга ёрдам берувчиларни топганини айтганди. «Эҳтимол, ‘Толибон’ ҳудуд бўйича устунликка эгадир, лекин улар аҳолининг онги ва қалбини назорат қила олмайди. Ҳукуматимиздан ‘Толибон’ни тан олмасликни сўрайман», — деди Америка лоббичи фирмасининг раҳбари.
Миллий қаршилик фронти 15 августда «Толибон» Кобул босиб олингандан кейин ҳам Афғонистон шимолини ҳимоя қилди. «Толибон» сентябрь бошида шимолий ҳудудни бўйсундиришга муваффақ бўлди ва ўз ҳукумати таркибини эълон қилди.
Изоҳ (0)