Бердимуҳамедов Ашхободдаги Махтумқули ёдгорлиги қурилишига ташриф буюрди. Унинг очилиши 2022 йилга режалаштирилмоқда

Туркманистон президенти Гурбангули Бердимуҳамедов 26 октябрь куни Махтумқули Фироғий маданият ва истироҳат боғи мажмуаси қурилишини кўздан кечирди. Ашхободнинг жануби-ғарбий чеккасида барпо этилаётган мажмуанинг марказида шоирнинг 60 метрлик ҳайкали қад ростламоқда, деб ёзади «Хроника Туркменистана».

Туркманистон бош вазири ўринбосари, агросаноат комплекси масалалари бўйича масъул Эсенмурат Оразгелдиев дарахт кўчатлари экиш учун ажратилган ер участкалари ва кўчатларнинг турлари ҳақида маълумот берди. Қайд этилишича, боғ участкаларга бўлиниб, уларнинг ҳар бирига алоҳида вазирлик ва идоралар жавобгар бўлади.

Давлат раҳбари тақдим этилган лойиҳа ва чизмалар билан танишиб, қатор мулоҳазалар билдирди ва ўзининг тегишли тузатишларини киритди.

Бош вазирнинг қурилиш-саноат ва энергетика комплекси назорати бўйича ўринбосари Чоримурат Пурчеков мажмуанинг (умумий майдони 13,5 гектар) бош режаси, у ерда қурилаётган объектларнинг лойиҳа ва чизмалари, шунингдек, унга олиб борувчи йўллар ва ёритиш тизимлари билан таништирди.

Мажмуанинг қурилиши 2022 йилда якунланиши керак, унинг очилиши эса ҳар йили Маданият ва санъат ходимлари куни муносабати билан ўтказиладиган Маданият ҳафталиги, шунингдек, Махтумқули Фироғий шеърияти кунига (27 июнь) мўлжалланган.

«2024 йилда Махтумқули Фироғийнинг 300 йиллиги нишонланади. Келаси йили мажмуанинг очилиши буюк классик шоир шарафига улуғвор байрамларни бошлаб беради. Бундан ташқари, 2024 йилни ‘Махтумқули Фироғий йили’ деб эълон қиламиз», — деди Туркманистон президенти.

Январь ойида Бердимуҳамедовга Махтумқули таваллудининг 300 йиллигини нишонлашга тайёргарлик кўрилаётгани ҳақида ҳисобот берилди. Маълум бўлишича, 2024 йилда бўлиб ўтадиган юбилейга шоир ҳаёти ва ижодига бағишланган веб-сайт, шунингдек, электрон шаклдаги «Махтумқули Фироғий энциклопедияси» ва «Махтумқули Фироғий девони» яратилади.