БМТнинг Нью-Йоркдаги бош қароргоҳида ташкилот Бош Ассамблеясининг «Иқлим бўйича чора-тадбирлар кўриш: одамлар, сайёра ва фаровонлик учун» олий даражадаги йиғилиши бўлиб ўтди, деб хабар беради Ўзбекистон ТИВ матбуот хизмати.
Тадбирда БМТ Бош котиби Антониу Гутерриш, БМТ Бош Ассамблеясининг 76-сессияси раиси Абдулла Шаҳид, 70 дан ортиқ давлатлар раҳбарияти даражасидаги делегациялар, шунингдек, ЮНЕП, ЭКОSOS, ЮНИСЕФ, РКИК раҳбарлари, фуқаролик жамияти ва ёшлар ташкилотлари вакиллари иштирок этган.
Форумда Ўзбекистоннинг БМТдаги доимий вакили Бахтиёр Ибрагимов сўзга чиқиб, Президент Шавкат Мирзиёевнинг иқлим ўзгаришига қарши курашиш, атроф-муҳит ва биохилма-хилликни муҳофаза қилиш борасидаги муҳим ташаббуслари ҳақида маълумот берган.
Иштирокчилар эътибори Орол денгизининг қуриши натижасида юзага келган экологик ҳалокатга ҳам қаратилган. Мазкур табиий офатнинг салбий оқибатларини бартараф этиш бўйича Ўзбекистон томонидан амалга оширилаётган кенг кўламли чора-тадбирлар кўрсатилган.
Эслатиб ўтамиз, Шавкат Мирзиёев 21 сентябрь куни БМТ Бош Ассамблеясининг 76-сессиясида нутқ сўзлаган эди. Давлат раҳбари ўз нутқида экология борасидаги чораларнинг мантиқий давоми сифатида 2022 йили Оролбўйи ҳудудида, Нукус шаҳрида «яшил» энергетика бўйича БМТ билан ҳамкорликда юқори даражадаги халқаро форум ўтказиш ташаббуси илгари сурилганди.
Бундан аввал АҚШдан Оролбўйи аҳолиси учун гуманитар ёрдам юборилгани, Жанубий Корея Оролбўйи минтақаси бўйича траст фондининг молиявий донорига айлангани ҳамда ҳукумат қарори билан Орол денгизи ва Оролбўйи ҳудудларида ўрмонзор барпо этиладиган майдон белгилангани ҳақида хабар берилганди.
Изоҳ (0)