26 октябрь куни Ўзбекистон бош вазирининг ўринбосари, инвестициялар ва ташқи савдо вазири Сардор Умурзоқов Жаҳон савдо ташкилоти бош директори ўринбосари Сянчен Чжан билан учрашув ўтказди, деб хабар беради вазирлик матбуот хизмати.
Маълум қилинишича, учрашувда Ўзбекистоннинг ЖСТга аъзо бўлиши бўйича музокара жараёнининг ҳозирги ҳолати ҳамда бу борадаги ҳамкорлик доирасида навбатдаги тадбирлар муҳокама қилинди.
Сянчен Чжан Ўзбекистон раҳбариятининг мамлакатнинг ЖСТга аъзо бўлиши жараёнини фаоллаштириш борасидаги саъй-ҳаракатларини юқори баҳолаган. Унга кўра, Ўзбекистоннинг ташаббускорлиги туфайли ташкилот билан ҳамкорлик жадал тус олган. Шунингдек, у 2021 йилнинг август ойида янги лавозимни эгаллаганидан бери ташриф буюрган биринчи мамлакат Ўзбекистон эканини таъкидлаган.
Қайд этилишича, мамлакат ҳукумати савдо-сотиқни эркинлаштириш, ЖСТ битимлари тамойиллари ва қоидалари асосида ташқи савдони ислоҳ қилиш тизимларини модернизация қилиш, хорижий инвестицияларни рағбатлантириш, шунингдек, барқарор иқтисодий ўсишни таъминлаш бўйича жаҳоннинг энг яхши амалиётларини жорий этишга оид саъй-ҳаракатларни давом эттиришга содиқ эканлиги таъкидланган.
Томонлар 2021 йил охиригача Ўзбекистоннинг ЖСТга аъзо бўлиши бўйича ишчи гуруҳнинг 5-йиғилишини ўтказиш бўйича ҳамкорликнинг амалий масалаларини муҳокама қилган.
Шунингдек, ташкилот раҳбарияти ушбу тадбирни ўтказишда ва умуман Ўзбекистоннинг ЖСТга аъзо бўлиши жараёнида ҳар томонлама қўллаб-қувватлашга тайёр эканлигини билдирган. Зарур ҳужжатларни тайёрлашда ЖСТ котибияти ва унинг халқаро экспертлари томонидан Ўзбекистонга кўрсатилаётган техник ёрдамни кенгайтириш бўйича келишувга эришилган.
«Учрашув якунида томонлар музокара жараёни билан боғлиқ барча масалаларни ҳал этишни жадаллаштириш юзасидан биргаликдаги ишларни фаоллаштиришга ўзаро тайёрлигини билдирдилар», — дейилади хабарда.
Аввалроқ Россия Ўзбекистоннинг Жаҳон савдо ташкилотига аъзо бўлиш жараёнида ёрдам беришга тайёрлигини билдирганди.
Изоҳ (0)